Reshjet e shumta kanë shkaktuar përmbytje në veriun e vendit, më së shumti në Shkodër dhe Lezhë. Shkak u bë dhe hapja e portave të hidrocentralit të cilët rritën nivelin e ujit. Në lidhje me këtë kreu i Partisë së Lirisë, Ilir Meta u shpreh se Shkodra u përmbyt pasi hidrovoret nuk ishin në punë pasi mungonte energjia elektrike.
Ndërkohë në lidhje me ndihmën e qeverisë për familjet e prekura Meta deklaroi se fondi për emergjencat civile në veri të vendit është vetëm 80 mijë euro në vit duke e krahasuar me 1 ditë pagese për inceneratorin e Tiranës.
“Përmbytja ishte ngjarje e paralajmëruar. Tashmë 1685 ha në bashkinë e Shkodrës të përmbytura, qindra e mijëra shtëpi të rrethuara nga uji, shumë familje të bllokuara, ndërkohë që bashkia e Shkodrës dhe autoritetet vendore nuk u lajmëruan sipas ligjit. Në Shkodër Hidrovoret s’kanë qenë në punë për mungesë të energjisë. Në Lezhë 1300 ha të përmbytura. Kjo situatë kritike është dhe në fushë-Krujë, 150 Ha në Mullqinë dhe Mallkuç. Natyrisht nuk mund të ngelej jashtë përmbytjeve dhe Durrësi, me zonën e ish-Kënetës dhe qendra e betonizuar e këtij qyteti, te Veliera. Nuk kishte se si të ndodhte ndryshe kur fondi vjetor i Bordit të Kullimit për Shkodrën, Kukësin dhe Lezhën është 80 mije euro në vit. Është aq sa vjedh vetëm për një ditë inceneratori i Tiranës, që nuk ekziston. Dëmet llogariten në qindra mln euro”, tha Meta.
