Pasi vizitoi të prekurit nëpër shtëpiat e tyre, kreu i PD Sali Berisha po mban një konferencë për mediat në Shkodër. Konferencën e hapi kryetari i Bashkisë së Shkodrës, Bardh Spahia, i cili e cilësoi situatën si shumë problematike dhe se në ditët në vijim mund të ketë edhe më shumë reshje dhe përmbytje.
“Aktualisht situata mbetet serioze për komunat Guri i Zi, fshati Kuç konkretisht, edhe në disa lagje në Shkodër. Edhe në zonën e nën Shkodrës mbetet problematike… Nuk kemi pasur asnjë informacion për hapjen e portave të hidrocentraleve”, tha Spahia.
Nga ana tjetër Berisha u shpreh se përgjegjëse është qeveria për gjendjen aktuale dhe se situata në Shkodër është krijuar nga “dora e njeriut”, pasi nuk u morën masat në kohën e duhur.
“Kjo fatkeqësi natyrore sigurisht nuk është e rrallë, por është krejt e veçantë kësaj here, është gjithçka jo dorë e Zotit, por e robit hajdut. E them këtë sepse kjo u krijua kryekëput nga keqadministrimi i kaskadës absolutisht të diktuar nga vjedhja qeveritare.
Çfarë ndodhi? Gjatë këtyre ditëve që ta dinë qytetarët, Rama dhe ministrja e tij Balluku, nuk kanë prodhuar energji, por kanë blerë me 226 euro megavat në bursë, në një kohë kur energjia e kontraktuar 10 mln euro mund të prodhohej pa asnjë lloj kufizimi, pasoje, në kaskadën e Drinit.
Sot Edi Rama fajin e gjen tek media dhe opozita për vjedhjen dhe katastrofën që krijoi vetë. Një javë më parë instituti i gjeoshkencës, i ka dërguar në zyrtar e vendimarrësve kryesorë, sinoptikën duke informuar se do ketë reshje të fuqishme në alpe dhe se duhet të merren masa”, tha Berisha.
