Kryetari i Partisë Demokratike Sali Berisha ka vizituar zonat e përmbytura në Shkodër këtë të hënë. I shoqëruar edhe nga kreu i Bashkisë Shkodër Bardh Spahia, Berisha ka takuar nga afër banorë të prekur. Kreu i PD hodhi akuza ndaj qeverisë për situatën.
“Dëshmi e një papërgjegjshmërie të plotë të qeverisë. Mbrëmë janë hapur tunelet e Komanit, kanë derdhur nga portat e Vaut të Dejës 2 mijë metër kub për sekondë, dhe të gjitha këto vetëm sepse nuk dilnin dot nga skema e vjedhjeve. Këto reshje kanë qenë të parashikuara. Qoftë nga Instituti i Gjeoshkencave, që ja ka dërguar shkresën në zyra këtyre qeveritarëve që vjedhja jua ka verbuar sytë. Instituti, në mënyrë specifike ka parashikuar reshje ekstreme dhe përmbytje në alpet e veriut, Këto nuk kanë mjaftuar për Ramën dhe Belinda Ballukun sepse e kanë mendjen të shfrytëzojnë energjinë për të vjedhur. Ndërsa importonin energji e kishin bllokuar prodhimin dhe tani thotë; e bëra për të shtuar rezervat. Por ku i pate sytë kur të dhënat e meteorologëve thanë se do të kenë reshje ekstreme. Pra nga data 14-20 nëntori 10 mln euro energji elektrike, 5 mln i fusin në xhep. Tani që ka plasur skandali përpiqen të mashtrojnë, Nuk donin të ndërprisnin vjedhjen dhe sot janë mbi 2500 hektarë të mbytura në të gjithë territorin e Shkodrës, dhe të gjitha këto janë nga skema e vjedhjes.
Zonja dilte dhe tmerronte shqiptarët se dimrin do e kemi të vështirë.”, tha Berisha.
Më pas Berisha do të ndalet edhe te Ura e Bahçallëkut dhe në fshatin Obot.
