Në momentet e fundit të protestës së opozitës, sapo Berisha mbaroi fjalimin e tij, një 25-vjeçar shkaktoi një moment rrëmuje.
Ndërkohë që Policia e Tiranës ka reaguar duke sqaruar motivin e shoqërimit të një të riu i cili ishte pjesëmarrës në protestën e sotme.
Sipas policisë, i shoqëruar është shtetasi J.Ç nga Lushnja. Ai mbane thikë në dorë dhe bënte lëvizje të pakontrolluara. Pas verifikimeve paraprake Policia thekson se i shoqëruari rezulton se vuan nga probleme të shëndetit mendor.
Reagimi i Policisë së Tiranës:
Sqarim i Drejtorisë Vendore të Policisë Tiranë
Në lidhje me shoqërimin e një shtetasi, në përfundim të tubimit të ditës së sotme, sqarojmë opinionin publik se:
Shërbimet e Drejtorisë Vendore të Policisë Tiranë, në zbatim të detyrave të planit të masave, të hartuar me qëllim garantimin e rendit dhe sigurisë publike, para, gjatë dhe pas përfundimit të tubimit, në përfundim të tubimit kanë konstatuar një shtetas që mbante në dorë një mjet prerës dhe kryente lëvizje të pakontrolluara.
Shërbimet e Policisë kanë ndërhyrë me profesionalizëm për të parandaluar çdo veprim të këtij personi, i cili mund të cënonte jetën e pjesëmarrësve në tubim dhe të punonjësve të Policisë që ishin në shërbim për të garantuar mbarëvajtjen e tubimit përsa i përket rendit dhe sigurisë.
Shërbimet e Policisë e kanë neutralizuar dhe shoqëruar shtetasin J. Ç., 25 vjeç, nga fshati Gurrëz e Vogël, Lushnjë, i cili nga verifikimet paraprake rezulton person me probleme të shëndetit mendor.
Sqarojmë se përveç këtij shtetasi nuk ka asnjë person tjetër të shoqëruar nga shërbimet e Policisë dhe se tubuesit janë shpërndarë pa krijuar probleme përsa i përket rendit dhe sigurisë publike.
Policia e Shtetit falënderon qytetarët për qytetarinë e treguar gjatë tubimit dhe i garanton ata se Policia e Shtetit është e angazhuar maksimalisht për të garantuar rendin, sigurinë, lirinë dhe të drejtat e qytetarëve.
