Ditën e sotme, kreu i Sindikatës së Pedagogëve Sandër Kovaçi ka rikujtuar se do të hyjnë në grevë urie nëse nuk ka një vendim pozitiv nga ana e qeverisë lidhur me kërkesat që ata kanë parashtruar. Ndërkohë që pas deklaratës së Kovaçit, ka ardhur një reagim nga vetë kryeministri Rama.
Në një postim në Twitter, ai shkruan me ironi se “Shiksi i NonGratës paska marrë urdhër për t’i dhënë ultimatum qeverisë me grevë urie të pedagogëve!”, duke iu referuar kreut të sindikatës, Sandër Kovaçi.
“Shiksi i NonGratës paska marrë urdhër për t’i dhënë ultimatum qeverisë me grevë urie të pedagogëve! Grevë urie për rritje rrogash bëjnë vetëm njerëz pa fe e pa atdhe, rublaxhinj pa din e pa iman, foltorexhinj e baltaxhinj që vetëm Shqipërisë e shqiptarëve nuk i shërbejnë”, shkruan Rama.
Vlen të theksojmë se që prej fillimit të vitit të ri akademik, pedagogët kanë nisur revoltën e tyre, ku kërkesat kryesore lidhen me paga më të larta dhe kushte më të mira pune. Kërkesa kryesore e pedagogëve është rritja e pagës me 50% dhe nuk kanë rënë dakord me atë që u ka ofruar qeveria. Më herët qeveria ka miratuar në mbledhjen e Këshillit të Ministrave rritjen me 15% të pagave për pedagogët. Ministrja e Arsimit Evis Kushi, e cila tha se 7% të rritjes do ta mbulojë buxheti i shtetit dhe 8% nga vetë Universiteti.
