Në orët e vona të mbrëmjes së djeshmë kryeqyeti u trondit nga një atentat, ku mbeti viktimë Briken Sanaj, 39 vjeç, nga Lezha.
Konkretisht ngjarja e rëndë ka ndodhur në Kodrën e Diellit, teksa 39-vjeçari dyshohet se është qëlluar nga një mjet tip ‘Benz’ në lëvizje. Bëhet me dije se viktima ka më shumë se një vit që është rezident tek “Kodrat e Diellit”. Mësohet se ai ka mbyllur makinën në garazhin e pallatit ku jeton dhe është takuar me tre të njohur në trotuar.
Gjatë kësaj kohe autorët janë afruar me makinë dhe në një distancë të afërt e kanë qëlluar me breshëri kallashnikovi. Të dhënat e mjetit i janë dhënë policisë, e cila ka ngritur postoblloqe në disa pika.
Briken Sanaj njihej nga rojet e rezidencës me identitetin Anton Gjini, por në dokumentet zyrtare emri i tij është Briken Sanaj.
Theksojmë se Sanaj ka tentuar ti shmanget plumbave por pa sukes. Pas të shtënave disa persona që ndodheshin në vendngjarje i kanë ardhur në ndihmë te plagosurit, duke e çuar në spital. Policia e Shtetit ka shoqëruar disa persona në komisiarat si të dyshuar për ngjarjen ndërsa në Qafë Kashar, në afërsi të një biznesi pllakash, është gjetur duke u djegur, një automjet.
Akoma nuk është zbardhur ngjarja e plotë dhe Policia po punon për sqarimin e plotë të rrethanave të ngjarjes së rëndë.
“Më datë 30.10.2022, te Kodra e Diellit, në rrethana ende të paqarta, është qëlluar me armë zjarri shtetasi B. S., rreth 39 vjeç, i cili ka ndërruar jetë rrugës për në spital.
Shërbimet e Policisë kanë shkuar menjëherë në vendngjarje, kanë ngritur pika kontrolli dhe vijojnë krehjen e zonës për identifikimin dhe kapjen e autorit/ëve.
Janë shoqëruar disa persona në Polici. Në Qafë Kashar, në afërsi të një biznesi pllakash, është gjetur duke u djegur, një automjet. Grupi hetimor po punon për sqarimin e plotë të rrethanave të ngjarjes dhe për fiksimin e çdo prove të vlefshme që mund të çojë në identifikimin e autorëve”, deklaroi në njoftimin zyrtar Policia e Shtetit.
