Ditën e sotme po zhvillohet protesta e pedagogëve, të cilët kanë listuar kërkesat e tyre ndaj qeverisë, ku kryesojnë pagat e larta si dhe më shumë mbështjetje financiare për kërkimin shkencor.
Ndërkohë që deputetja e Partisë Demokratike, Jorida Tabaku ka renditur 3 arsyet pse duhet të jemi në krah të pedagogëve.
Me anë të një statusi në “Facebook” Tabaku shprehet se protesta tregon dështimin e reformës në arsim dhe gjithashtu është revoltë e cilësisë së ulët të jetës së pedogogëve.
Së treti një theks i rëndësishëm vendoset tek shkatërrimi i sistemit të kërkimit që rrjedhimisht sjell edhe zhvillim për vendin tonë.
Reagimi i plotë i Jorida Tabakut:
Protesta e sotme e pedagogëve ka shumë arsye përse duhet mbështetur. Por mendoj tre janë më kryesoret:
Së pari, tregon të vërtetën në lidhje me Arsimin e Lartë Publik dhe dështimin e Reformës në Arsim që prodhoi një sistem arsimor më të dobët dhe inefektiv. Parajsa e premtuar rezultoi një gënjeshtër e madhe, cilësia në rritje rezultoi në më pak studentë në auditore.
Së dyti, cilësia e jetës për shtresën e pedagogëve është gjithnjë edhe më e ulët. Ata janë pjesë e shtresës së mesme dhe qytetarëve të angazhuar që përbuzen dhe keqtrajtohen nga një mazhorancë që sistematikisht ka sulmuar këtë shtresë. Largimi i shqiptarëve sot është shenjë e kësaj dobësie.
Së treti, shkatërrimi i sistemit të kërkim-zhvillimit që përkthehet në adaptimin e ekonomisë sonë me sfidat edhe risitë e reja teknologjike. Nuk është rastësi që “biznesi” vetëm i mirë është ai i ndërtimit dhe jemi pas në manifakturë, teknologji, zhvillimin e programeve kompjuterike! Nuk do të mund të kemi një Shqipëri të shqiptarëve nëse nuk kemi një vend që trajton shtresën e mesme duke i dhënë shanse dhe mundësi! Nuk mund të jemi një komb i suksesshëm nëse nuk kemi një shoqëri që ofron mobilitet social. Nuk mund të jemi një shoqëri e moralshme nëse nuk respektojmë dinjitetin e pedagogëve.
