Shqipëria ka rënë ‘viktimë’ e sulmeve kibernetike nga Irani teksa çdo ditë e më shumë publikohen të dhëna sensitive nga sisteme të ndryshme, me të cilët operojnë institucionet në vend.
Ndërkohë që ditën e djeshme u publikuan të dhëna që u morën nga sistemi “MEMEX”, eksperti i teknologjisë ngre alarmin për sistemet e tjera.
Said Duleviç u shpreh për “ABC Neës” që analizës i mungojnë dy të dhëna të rëndësishme: nuk dimë akoma se çfarë është marrë konkretisht si dhe nuk dihet akoma burimi i hakerimit.
Ai gjithashtu tha se mund të ketë një lloj manipulimi të sistemit MEMEX duke iu referuar të dhënave të hakeruara më parë nga Policia e Shtetit.
“Edhe mund të ndodhë patjetër sepse kanë marrë të dhëna sensitive, kanë marrë ndoshta dhe ndonjë listë nga Policia e Shtetit, mund të jetë nxjerrë një lloj liste që mund të ketë qenë e Policisë së Shtetit, por mund të jetë publikuar si e dhënë e Memex”, tha ai.
Duke bërë një analizë si ekspert i teknoligjisë së informacionit Said Duleviç u shpreh se “duke parë një lloj rrjedhje të dhënash, kanë bërë një lloj lidhje, duke marrë një emër, një numër telefoni, një numër karte identiteti.”
Duleviç krahasoi sulmin kibernetik në Shqipëri me atë në vendet e Ballkanit Perëndimor, duke vendosur theksin tek fakti se hakerat në sistemet shqiptare kanë qëndruar për shumë kohë dhe si pasojë historia mund të përsëritet sërish, dhe virusi mund të rimarrë jetë.
“Por mendoj që në momentin që sistemi është rivënë në punë, është bërë ndonjë lloj testimi nëse ka pasur virus si backup, mund të jetë ndonjë virus që ka hyrë prej shumë kohës, ka qenë pjesë e sistemit. Nëse janë marrë llogari dhe nga institucione të tjera, do të ishte një problem shumë i madh”, u shpreh Duleviç.
