Për herë të parë, kryeministri Rama ka konfirmuar se ish-drejtorit të Përgjithshëm të Policisë së Shtetit, Gledis Nano i ishte kërkuar dorëheqja.
Rama tha se kërkesa erdhi pas shqetësimeve për zhvillimet për rendin publik
“Po është e vërtetë. I është kërkuar dorëheqja drejtorit të mëparshëm, Gledis Nano. Ai ma ka konfirmuar se do ta jepte dorëheqjen ditën e hënë pasi biseda ishte bërë të shtunën nga ministri. Ishim shumë të shqetësuar për zhvillime të pa pëlqyeshme lidhur me rendin publik dhe me vetë policinë e shtetit. Ai ma ka konfirmuar se do ta jepte dorëheqjen ditën e hënë pasi biseda ishte bërë të shtunën nga ministri”, deklaroi Rama.
Kujtojmë që drejtori i ri u emërua Muhamet Rrumbullaku. Gledis Nano është shkarkuar nga detyra si Drejtor i Përgjithshëm i Policisë së Shtetit, me argumentin që nuk kishte plotësuar objektivat. Më herët gazetari investigativ, Artan Hoxha ka deklaruar në emisionin “Opinion” se shkarkimi i Gledis Nanos nga posti i drejtorit të policisë së Shtetit u bë nga vetë kryeministri Edi Rama për shkak se Nani nuk ruajti balancat e caktuara.
Mes të tjerash, Hoxha tha se reagimi i ambasadës amerikane në Tiranë kishte treguar se nuk ishin aspak dakord me shkarkimin e Nanos. Sipas gazetarit, Gledis Nano u emërua politikisht dhe po në atë mënyrë u shkarkua.
“Gledis Nano u zgjodh politikisht dhe u shkarkua po politkisht dhe përplasja e tij ka qenë me kryeministrin sepe ky e heq drejtorin. Ne e dimë se çfarë kryeministri kemi. Në rastin konkret Nano nuk ka marrë përsipër të ruajë balancat që ja përcaktuan dhe u ndëshkua politikisht. Kjo gjë që u bë atëherë, duke marrë një njeri të pakompromentuar që kishte kontakte me aleatët kryesorë. Në momentin kur u largua besoj të gjithë e panë reagimin e ambasadës amerikane. Reagimi i ambasadës në mbrojtje të drejtorit të përgjithshëm që u shkarkua është thelbi i konfliktit”-tha Hoxha.
