Kanë kaluar dhjetë ditë nga supergrabitja e miliona eurove në pistën e aeroportit të Rinasit. Ndërkohë policia dhe prokuroria nuk kanë ende emra të autorëve që kanë marrë pjesë në të.
Pavarësisht se ditën e sotme dolën dhe informacione për persona të përfshirë në këtë ngjarje.
Nëpërmjet një njoftimi për mediat “Policia e Shtetit së bashku me Prokurorinë dhe agjencitë e tjera ligj – zbatuese mbeten të angazhuara për zbardhjen sa më të shpejtë të rrethanave të grabitjes, zbulimit të autorëve dhe përballjen e tyre me drejtësinë”.
Prokuroria e Krimeve të Rënda i ka mohuar lajmet e publikuara ditën e sotme në media mbi identitetin e dy prej grabitësve të 6.5 milionë euro në aeroportin e Rinasit.
Fillimisht u raportua se dy nga pesë grabitësit ishin identifikuar dhe pritej arrestimi i tyre. Megjithatë, në një reagim të përbashkët të Prokurorisë dhe Policisë thuhet se këto lajme janë të pavërteta.
Reagim i Prokurorisë së Krimeve të Rënda dhe Policisë së Shtetit:
Lidhur me disa publikime në media ditën e sotme, për hetimet mbi grabitjen e datës 9 prill 2019 në Rinas, grupi i posaçëm hetimor deklaron se këto lajme janë të pavërteta dhe të pasakta.
Duke përfituar nga ky komunikim me mediat dhe publikun, gatantojmë qytetarët se Policia e Shtetit, Prokuroria dhe agjenci të tjera ligj zbatuese mbeten shumë të angazhuara për zbardhjen sa më të shpejtë të rrethanave të grabitjes, zbulimit të autorëve dhe përballjen e tyre me drejtësinë.
Çdo qytetar që ka informacion që beson se ndihmon hetimin, mund të telefonojë falas në numrin 112, duke ju garantuar anonimatin.
