Një ngjarje e pazakontë është raportuar nga ish-Presidenti Donald Trump, i cili ka deklarura se shtëpia e tij në Florida ishte “bastisur” nga FBI. Ai bëri me dije se gjatë kontrollit të FBI në shtëpinë e tij agjentët hapën një kasafortë. Trump tha në një deklaratë se Mar-a-Lago në Palm Beach ishte “pushtuar nga një grup i madh agjentësh të FBI”. Kjo ngjarje besohet se ka të bëjë me një hetim për trajtimin e dokumenteve zyrtare nga zoti Trump. Mediat amerikane raportojnë se kërkimi lidhet me dokumentet që presidenti mund t’i ketë çuar në Mar-a-Lago pas largimit nga Shtëpia e Bardhë. Avokatja e zotit Trump, Christina Bobb, i tha NBC Neës se disa dokumente ishin sekuestruar gjatë kontrollit. Kjo ngjarje vjen në një periudhë që Trump pritet të hedhë kandidaturën për President i ardhshëm i SHBA në zgjedhjet e vitit 2024.
“Këto janë kohë të errëta për kombin tonë”, filloi deklarata e Trump.
Ai tha se kishte bashkëpunuar me të gjitha agjencitë përkatëse qeveritare dhe kështu “bastisja e paparalajmëruar në shtëpi nuk ishte e nevojshme apo e përshtatshme”.
Trump tha se kjo përbënte “sjellje të pahijshme prokuroriale” dhe “armatim të Sistemit të Drejtësisë” për ta penguar atë të kandidojë përsëri për Shtëpinë e Bardhë.
“Një sulm i tillë mund të ndodhë vetëm në vendet e shkatërruara, të botës së tretë,” tha ai.
“Mjerisht, Amerika tani është bërë një nga ato vende, të korruptuara në një nivel të paparë më parë.
“Ata hynë edhe në kasafortën time!”
Sipas CBS News, raporton BBC, Trump ishte në Kullën Trump në New York City në kohën e bastisjes së raportuar të hënën.
Në shkurt, Arkivi Kombëtar, agjencia e qeverisë amerikane që menaxhon ruajtjen e të dhënave presidenciale, i kërkoi departamentit të drejtësisë të hetonte zotin Trump për trajtimin e dokumenteve zyrtare.
Arkivi Kombëtar tha se kishte marrë 15 kuti nga Mar-a-Lago, disa prej të cilave përmbanin të dhëna të klasifikuara.
Presidentëve të SHBA-së u kërkohet me ligj që të transferojnë të gjitha letrat, dokumentet e punës dhe emailet e tyre në Arkivin Kombëtar.
Por zyrtarët thonë se ish-presidenti grisi ilegalisht shumë dokumente.
Disa prej tyre duhej të ngjiteshin përsëri së bashku, thanë Arkivat. Trump në atë kohë hodhi poshtë raportet se ai kishte keqpërdorur të dhënat zyrtare si “lajme të rreme”.
Një këshilltar i lartë i Trump në Palm Beach i tha CBS se kërkimi nga agjentët federalë në Mar-a-Lago kishte të bënte me të dhënat presidenciale.
