Isa Sakja, kryetari i Bashkisë që solli PD-në në Kavajë mesa duket nuk ka mbajtur pastërtinë e premtuar në krye të kësaj detyre.
Disa detaje të reja sa i përket Sakjes dhe çështjes së tij, ku së fundmi edhe është depozituar një kallzim penal ndaj tij për shpërdorim detyre nga IKMT, kanë dalë nga Shqiptarja.com.
Disa të dhëna të siguruara prej kësaj mediaje, tregojnw se kryetari i Bashkisë së Kavajës ka dhënë 10 tendera të dyshimtë, me vlerë 187 525 604 lekë ose rreth 1.5 milionë euro, ndërkohë që IKMT e ka paditur për dhënien e lejeve abuzive në ndërtimin e 7 objekteve.
Pra nga 10 rastet e zbuluara të tenderave, në 8 raste ajo që vihet re është se gjithë kompanitë e tjera janë përjashtuar nga gara, përveç asaj që e ka fituar, ndërsa në 2 tenderat e mbetur vërehet mungesë konkurrence, kjo sepse vetëm një kompani merr pjesë, gjë që automatikisht do ta bënte atë fituese.
Sipas Shqiptarja.com duhet të nënvizojmë faktin se këto procedurat nuk janë të paligjshme, por janë të dyshimta, pasi krijojnë mundësi për klientelizëm, abuzim dhe keqmenaxhim të parave publike.
Por ku dallohet kjo?
Në të 10 tenderat që ka akorduar bashkia, dëmi që kanë sjellë në buxhet ka sjellë efekte negative.
P.sh.: Nëse fondi limit për rikonstruksionin e trotuarëve Shëtitorja nr. 2 Kavajë, ishte 70 441 537 lekë, oferta fituese është shpallur në vlerën 69 668 590 lekë, ndërsa janë skualifikuar të gjitha kompanitë e tjera përveç kompanisë fituese. Për ndërtimin e një parku rekreativ në lagjen nr. 2 në Kavajë, fondi limit ishte 57 800 015 lekë, ndërsa oferta fituese rezulton 57 294 183 lekë.
Detajet e dhëna nga Shqiptarja.com sa i përket çështjes
Tenderat e dyshimtë të Bashkisë Kavajë:
- Tender për rikonstruksionin e trotuarëve Shëtitorja nr. 2 Kavajë, datë 7 gusht 2018, fondi limit 70 441 537 lekë, oferta fituese 69 668 590 lekë. Janë skualifikuar të gjitha kompanitë e tjera në garë, përveç kompanisë fituese.
- Tender për ndërtimin e Parkut Rekreativ, Lagjia nr. 2, tek ish-Ushtria, Faza I-rë, datë 27 prill 2018, fondi limit 57 800 015 lekë, oferta fituese 57 294 183 lekë. Janë skualifikuar të gjitha kompanitë e tjera në garë, përveç kompanisë fituese.
- Tender me objekt sistemim asfaltim i rrugës Luz i Vogël, datë 26 nëntor 2018, fondi limit 12 250 797 lekë, oferta fituese 11 851 240 lekë. Janë skualifikuar të gjitha kompanitë e tjera në garë, përveç kompanisë fituese.
- Tender me objekt sistemim asfaltim i rrugës Synej-Bago, data 22 dhjetor 2018, fondi limit 12 297 735, oferta fituese 11 806 170 lekë. Janë skualifikuar të gjitha kompanitë e tjera në garë, përveç kompanisë fituese.
- Tender me objekt ndërtim parku rekreativ, data 28 dhjetor 2018, fondi limit 24 995 616 lekë, oferta fituese 24 715 421 lekë. Janë skualifikuar të gjitha kompanitë e tjera në garë, përveç kompanisë fituese.
- Tender për blerje matësa uji, datë 20 mars 2018, fondi limit 3 000 000 lekë, oferta fituese 2,940,000 lekë. Janë skualifikuar të gjitha kompanitë e tjera në garë, përveç kompanisë fituese.
- Tender për blerje karburanti, datë 26 mars 2018, fondi limit 2 751 200 lekë, oferta fituese 2 462 324 lekë. Në tender ka marrë pjesë vetëm një kompani.
- Tender me objekt blerje rakorderi, datë 22 gusht 2018, fondi limit 2 934 150 lekë, oferta fituese 2 746 000 lekë. Janë skualifikuar të gjitha kompanitë e tjera në garë, përveç kompanisë fituese.
- Tender me objekt blerje të materialeve hidraulike, datë 2 nëntor 2018, fondi limit 1 666 667 lekë, oferta fituese 1 514 000 lekë. Në garë ka marrë pjesë vetëm një konkurrent.
- Tender me objekt blerje asfaltobetoni me rërë e zall lavatriçe, datë 14 nëntor 2018fondi limit 4 916 667 lekë, oferta fituese 4,890,000 lekë. Janë skualifikuar të gjitha kompanitë e tjera në garë, përveç kompanisë fituese.
