Java ka nisur me ndryshime të mëdha në qeveri.
Vetë kryeministri Rama ka bërë të ditur me anë të një njoftimi në “Twiter” se ndryshimet vijnë në kuadër të prioritetetit që do i jepet negociatave me BE-në.
Kreu i qeverisë Edi Rama ka shkarkuar Arben Ahmetajn nga posti i zëvendëskryeministrit dhe ministrit të Shtetit për Rindërtimin.
Në vend të tij është emëruar Belinda Balluku. Rama ka larguar nga posti i Kryenegociatorit me BE edhe Zef Mazin, duke e zëvendësuar me Majlinda Dhukën. Sipas Ramës, tani që prioriteti i Rindërtimit ia lë vendin prioritetit të Negociatave me BE do të ndërrojë edhe profili i ministrave.
“Tani që prioriteti i Rindërtimit ia le vendin prioritetit të Negociatave me BE, ndërron profili i ministrit të Shtetit. Majlinda Dhuka,një profil i lartë teknik në vend të profilit të lartë diplomatik të ambasadorit Mazi, bëhet Kryenegociatore& Ministre Shteti pranë kryeministrit”, shkruan Rama. Theksojmë se dekretet janë firmosur nga presidenti i ri i vendit, Bajram Begaj.
Kujtojmë që data 19 korrik shënoi një ngjarje të rëndësishme për vendin tonë pasi Shqipëria nisi bisedimet zyrtare në tryezë me Bashkimin Europian. Kjo ditë është historike pas 16 viteve nga firmosja e marrëveshjes së Stabilizim-Asocimit, ku nisi rrugëtimin drejt BE-së dhe 8 viteve nga marrja e statusit të vendit kandidat.
