Ish kryeministri Sali Berisha gjatë një deklarate për mediat i ka bërë thirrje policisë së shtetit të mos provokojë akte dhune, të mos presionojnë dhe të mos dhunojnë protestuesit. Me vetëbesim të lartë për ditën e nesërme ai i ka bërë thirrje edhe Kryeministrit Edi Rama që të mendojë mundësinë e dhënies së dorëheqjes, pasi sipas tij ky është edhe qëllimi i protestës, pasi Rama është shkaku i gjendjes aktuale të vendit tonë
Duke folur për media, Berisha ftoi edhe kryeministrin Edi Rama që të mendojë dorëheqjen, ndërsa iu bëri sërish thirrje shqiptarëve që të bashkohen nesër në protestë, pasi sipas tij, dita e nesërme do të jetë një ditë beteje të vërtetë.
“Një thirrje për cdo shqiptar të bashkohet nesër në protestën e 7 korrikut, për të kërkuar dorëheqjen dhe largimin e Edi Ramës dhe qeveritarëve të qeverisë së tij nga pushteti. Situata është jashtëzakonisht e ndezur. Pakënaqësi dhe urrejtja për këtë qeveri ka rrokur qiellin. Pandjeshmëria e saj është gjithashtu po kaq e madhe. Mos të harrojmë se një kauzë të drejtë asgjë nuk mund ta mposhtë. Ndaj dhe shfrytëzoj këtë rast për të ftuar cdo qytetar dhe qytetare të këtij vendi të kontribuojë me praninë e tij në suksesin e protestës. Paralajmëroj të gjithë llojet e policive, se cdo presion, cdo qëndrim, cdo përpjekje për të intimiduar, për të dhunuar, për të penguar, popullin opozitar, do të regjistrohet dhe do të marrë ndëshkim personal të merituar ligjor. Paralajmëroj të mos provokojnë protestuesit. Është e vërtetë që vapa dhe temperaturat janë të larta, por më të larta janë temperaturat e brendshme të njerëzve, që vijnë të protestojnë ndaj këtij regjimi. Nesër pra është një ditë e madhe. Nesër është një ditë frymëzimi, një ditë beteje të vërtetë. Opozita zbret në shesh. Edi Rama është i ftuar të mendojë dorëheqjen e tij sa më parë”, tha Berisha.
