Ditën e sotme një aksident me pasoja tragjike ka ndodhur në Fushë-Krujë. Bëhet e ditur se viktima është një 55-vjeçare, e identifikuar si Lume Rryta.
Aksidenti është regjistruar në fshatin Larushk të Fushë-Krujës ku një makinë ka përplasur për vdekje gruan 55-vjeçare.
“Krujë/Informacion paraprak, rreth orës 12:00, në fshatin Larushk, Fushë Krujë, automjeti me drejtues shtetasin M. Xh., 55 vjeç, ka aksidentuar shtetasen L. R., rreth 55 vjeçe, e cila për pasojë ka humbur jetën. Drejtuesi i mjetit, shtetasi M. Xh., është shoqëruar në Komisariat, për veprime të mëtejshme procedurale. Grupi hetimor ndodhet në vendngjarje dhe po punon për sqarimin e rrethanave të aksidentit”, thuhet në njoftimin e policisë së shtetit.
Vlen të theksojmë së aksidentet në Shqipëri mbeten në shifra të larta, teksa vetëm muajin maj 2022 numërohen 106 aksidente rrugore. Gjatë 5 muajve të parë të vitit, 66 persona kanë ndërruar jetë dhe 825 të tjerë janë plagosur. Referuar të dhënave të policisë, 81 prej tyre kanë marrë plagë të rënda në trup dhe 740 persona u dëmtuan më lehtë. Në pjesën më të madhe të ngjarjeve, shkak i aksidentit ka qenë sjellja e drejtuesit të mjetit. Kryesisht, ngjarjet rrugore janë kryer nga grup-mosha 20 deri në 34 vjeç. Që prej muajin janar të këtij viti e deri më tani, në të gjithë vendin kanë ndodhur 694 aksidente rrugore.
