Nga 1 qershori 2022, hyri në fuqi ligji që ndalon tërësisht përdorimin e qeseve plastike nëpër markete duke ndryshuar ligjin “Për menaxhimin e integruar të mbetjeve”.
Sipas këtij ligji, duke filluar nga 1 qershor 2022, supermarketet dhe çdo dyqan lagjeje e ka të ndaluar që të japë qese plastike për klientët, në të kundërt rrezikojnë të gjobiten.
Por nga 1 korriku do të nisë aplikimi i gjobave për qeset plastike. Është kryeministri Edi Rama që ka njoftuar vendimin, në një shënim në llogarinë e tij në Facebook.
Ndërkohë që kanë kaluar më shumë se 3 javë nga hyrja në fuqi e ligjit, kryeministri Edi Rama ka njoftuar se ka përfunduar edhe afati i lënë për ndërgjegjësimin e të gjithëve, pasi nga 1 korriku sipas tij do të nisin gjobat për ata që nuk e zbatojnë ligjin.
“Kënaqësia e qeseve prej letre në pazaret e ditës. Sa mirë të shohësh që përditë e më shumë tregtarë po zëvendësojnë qeset e dëmshme plastike, me qeset e shëndetshme të letrës, ndërsa shumë blerës po marrin trasta për pazar Kështu mbrojmë Shqipërinë e fëmijëve tanë nga dëmi i frikshëm i qeseve plastike mbi mjedisin dhe shëndetin Në 1 korrik nis aktivizimi i gjobave!”, shkruan Rama në Facebook.
Vlen të theksojmë se ndalimi është vetëm për qeset njëpërdorimshëm me trashësi deri në 70 mikronë nga secila anë me kapacitet mbajtës jo më pak se 10 kg dhe me përmasa jo më pak se 50 cm gjatësia dhe 24 cm gjerësia, pa përfshirë gjerësinë e palosjes.
Praktikisht sipas Ministrisë së Mjedisit janë qeset qe jepen në fruta-perime, qeset aktuale të supermarketeve dhe të ngjashmet e tyre. Ndërsa çdo qese tjetër mbi 70 mikron, me kapacitet mbajtës mbi 10 kg dhe me përmasat fizike mbi kufirin e përmendur, konsiderohet qese shumëpërdorishme dhe përdorimi i tyre nuk është i ndaluar.
Për qeset plastike të sekuestruara do të ndiqet procedura e riciklimit.
