Prokuroria holandeze ka kërkuar 3 vite burg për një 30-vjeçar shqiptar, i cili u kap me 5 kilogramë kokainë në afërsi të Deventerit në Holandë. Shqiptari u ndalua nga policia teksa po drejtonte një mjet tip “Opel Insignia” dhe gjatë kontrollit në makinë iu gjet 5 kg kokainë e fshehur nën kroskot. Prokuroria holandeze dyshon se shqiptari është pjesë e një rrjeti ndërkombëtar të trafikut të drogës, pasi mësohet se kjo makinë ndiqte një intinerar fiks, sepse rregullisht kalonte kufirin gjerman në Venlo përpara se të hynte në Belgjikë. I riu shqiptar ka gjetur një justifikim jo shumë të besueshëm për holandezët duke thënë se ai kishte ardhur në Holandë për të takuar një vajzë që e kishte njohur në rrjetin social Tik-Tok.
Por kjo nuk është gjithçka që nuk bind prokurorët holandez, pasi 30-vjeçari shqiptar ka bërë të ditur se ai ia kishte marrë makinën hua një të panjohuri në Gjermani, shkruajnë mediat holandeze.
Në lidhje me këtë gjykata ka pyetur të dyshuarin “A nuk është e çuditshme që dikush që nuk e njeh të jep hua makinën?”.
Ndërkohë, i riu shqiptar iu përgjigj duke thënë: “Kjo s’është ndonjë gjë e pazakontë për ne shqiptarët kur takohesh jashtë vendit”.
“Ju huazoni një makinë nga dikush që nuk e njihni dhe nuk ia dini emrin ose ku jeton. Kjo është një histori e çuditshme, zotëri”, ia ktheu gjykatësi.
Më tej reagoi edhe prokurori publik duke iu drejtuar me këto fjalë: “Këtu po flasim për krime të rënda. Trafikimi i drogave të forta shpeshherë shoqërohet me flukse parave dhe dhunë” të tepruar”.
Ndërkaq, avokati i shqiptarit, Alexander Admiral ka kërkuar lirimin e klientit të tij me motivin se ky i fundit nuk e kishte idenë që droga ishte fshehur në makinë dhe kërkoi lirimin e 30-vjeçarit shqiptar ndërsa iu referua vendimeve të gjykatave të tjera me raste të ngjashme.
“Ai nuk e kishte idenë se kishte një hapësirë të fshehur në makinën që mori hua. Klienti sigurisht që nuk e dinte që përmbante pesë kilogramë kokainë.”
Në makinën që drejtonte 30-vjeçari kishte një ndarje të fshehur, ku oficerët gjetën një tel. Pas hetimeve, rezultoi se ajo hapësirë ishte e aksesueshme përmes një truku të atillë ku fillimisht duhej ndezur motori, më pas duhej ndezur ngrohja e xhamit të pasmë dhe më pas vendosej një magnet. Në kroskot policia gjeti pesë pako me kokainë e cila nëse do të hidhej në treg do të kapte shifrën e 350 mijë eurove.
“Nëse jeni të bindur se realisht kam qenë në dijeni për drogën në makinë, ju kërkoj të mos më dënoni me tre, por me tridhjetë vjet”, është shprehur shqiptari.
Kujtojmë se kohët e fundit kemi shumë shqiptarë të përfshirë në trafik ndërkombëtar të drogës. Kujtojmë se dias dit më parë në Peru u sekuestruan 2.2 tonë kokainë me vlerë 160 milion euro e cila kishte destinacion Roterdamin e Hollandës.
