Nuredin Dumani, është kthyer sërish në qendër të vëmendjes për shkak se dyshohet se ai kishte në plan të ekzekutonte një oficer policie. Fotoja e oficerit me iniciale K.G është gjetur në celularin e Dumanit, ndërkohë që tashmë shënjestra është marrë në mbrojtje nga policia.
Vlen të theksohet se shtetasi me inicialet K.G ka qene më herët me detyrë oficer në Elbasan dhe ka hetuar disa nga ngjarjet kriminale atje, përfshirë dhe ngjarjet ku dyshohet se urdhërues i krimeve është Erjon Alibej.
Kujtojmë që Nuredin Dumani i arrestua në Fier rreth 2 muaj më parë, ka pranuar të bashkëpunojë me drejtësinë, duke marrë statusin e të penduarit. 39-vjeçari Dumani ishte shpallur në kërkim për vrasjen e vëllait të Talo Çelës. Ndaj tij Gjykata e Rrethit Gjyqësor Elbasan ka caktuar masën e sigurisë “Arrest me burg”, për veprat penale “Vrasje me paramendim” e kryer në bashkëpunim dhe “Armëmbajtje pa leje”. Sipas burimeve, mësohet se Nuredin Dumani është identifikuar nga kamerat e sigurisë teksa qëllonte me pistoletë ndaj Bujar Çelës. Krahas akuzave për vrasjen e vëllezërve Viktor e Besmir Haxhia si dhe miqve të tyre Anxhelo Avdia e Dorian Shkoza , SPAK po e heton Nuredin Dumanin edhe 5 vrasje të tjera. Dumani dyshohet se në bashkëpunim me ish-mikun e tij Talo Çela ka ekzekutuar Endrit Alibej, xhaxhain e tij Arben Dylgjeri dhe një shtetas turk.
Dyshohet se Dumani ishte i pari që qëlloi në drejtim të 62- vjeçarit Çela. Dumani dyshohet edhe si vrasësi i vëllezërve Haxhia në Durrës, dy vite me pare, si edhe për një tjetër vrasje në Rrogozhinë.
