Zëvëndës Kryeministri Arben Ahmetaj është zënë ngushtë nga pyetja e një gazetareje në lidhje me situatën e fundit, rritjen e çmimeve. Teksa ai fliste për masat e ndërmarra nga qeveria gjatë një konference ku sqaroi vendimet e marra në mbledhjen e fundit të qeverisë, një prej gazetareve të pranishme i rikujtoji Ahmetajt se për shkak të rritjes së çmimit të naftës shumë qytetarë janë detyruar të braktisin makinat dhe të lëvizin me transport publik, ndonëse këta të fundit ofrojnë kushte jo të mira për përdoruesit e tyre. Ankesat e qytetarëve kanë qenë të shpeshta në lidhje me vonesat në stacion, dhe me mungesë të sistemit të ajrimit apo kondicionerave. Të dy këto problematika ndër të tjera theksohen më shumë për shkak të se jemi në stinën e verës dhe temperaturat janë të larta. Në lidhje me këto problematika për shkak të rritjes së çmimit të naftës natyrshëm gazetarja e pyeti numrin 2 të qeverisë nëse dhe vetë ai i ishte bashkuar thirrjeve për kursim të qeverisë, por Ahmetaj iu shmang një përgjigje konkrete.
Gazetarja: E kam lënë makinën dhe jam detyruar që të lëviz me autobus, ndërkohë që dhe këta të fundit i ka kapur kriza e naftës, dhe nuk ndezin kondicionerët. Ju me çfarë keni ardhur në punë sot? A keni shmangur lëvizjet me makinë?
Ahmetaj: Unë dua të ndaj me ju që qeveria ka menduar para disa muajsh për qytetarët, me ato paketa publike që janë në funksion, Shqipëria e ka inflacionin më të ulët se i gjithë rajoni, kjo ka të bëjë me mbështetjen që qeveria i ka dhënë qytetarëve. Ju ftoj që ta shikoni të shikoni statistikën e rajonit. Është një krizë globale fatkeqësisht, që e ka gjenezën në Ukrainë, siç e shihni globalisht diskutimi është për sigurimin e rrugëve të furnizimit. Po në këtë fazë ku gjithë kriza e preson tregun, ne do të vuajmë dhe pasojat e asaj krize, që nuk i dihet fundi. Qeveria mbi të gjitha është përgatitur që hap pas hapi të marrë masat e duhura.
Ahmetaj foli dhe në lidhje me Bordin e Transparencës. Duke konfirmuar vazhdimsinë e tij la të kuptohet se abuzimet me çmimet do të luftohen në çdo mënyrë.
“Qeveria punon çdo ditë dhe morëm mbi 20 e ca detyra që kryeministri dha për kabinetin në raport me ndjekjen e politikave për përballimin e krizës. Është krizë e shkaktuar nga njeriu dhe bllokimi i rrugëve të furnizimit. Por qeveria do ti përdorë të gjithë instrumentet e duhura për të frenuar rritjen abuzive të çmimeve. Çdo instrument që vlen për të frenuar abuzimet do të funksionojë”, theksoi ai.
