Ditën e djeshme SPAK ka organizuar një mega-operacion ku janë lëshuar 32 urdhër-arreste. Ka qenë Nuredin Dumani ai që është ‘zbërthyer’ dhe ka nxjerrë kokat e krimit në vend.
Një ditë më pas ka reaguar ish-kryeministri Sali Berisha duke e konsideruar operacionin si një blof të madh. Në konferencën e përjavshme me gazetarët, Berisha ka deklaruar se u kapën vetëm ushtarët dhe “bosët” janë ende në arrati.
“Një blof i madh mbushi dje faqet e mediave digjitale e të shkruara dhe studiot televizive. Një operacion që ishte disfatë dhe që u shpall sukses i madh në të cilën nga 32 urdhër-arresti janë realizuar gjithësej 7-8 ushtarë, ndërsa bosët që të gjithë u larguan pasi u njoftuan në drejtime të pa ditura. Pse them unë u njoftuan? Nuk kam të dhëna që morën mesazhe, telefonata nga narko-policia apo institucione të tjera. Një të dhënë e kanë të gjithë shqiptarët. Disa ditë më parë, u bë publike se Dumani një vrasës serial është bërë i penduar. Në qoftë se Prokuroria dhe kushdo tjetër është i interesuar të gjej denkospirimin, ky është akti më madhor. Të gjithë ata të cilët e dinin se kishin bërë porosi te Dumani, apo Dumani dinte aferat e zeza të tyre, sigurisht që lehtë e lehtë, morën arratinë dhe u zhdukën”, deklaroi Berisha.
