Ukraina tashmë po përjeton më shumë se 2 muaj luftë, mes bombardimeve të tmerrshme dhe humbjeve masive nga mizoria ruse.
Ndërkohë që një shpërthim i madh ka ndodhur pranë një aeroporti në një pjesë të pushtuar nga Rusia të Ukrainës jugore.
Sipas CNN, tym i dendur dhe i zi u pa të ngrihet nga afërsia e një aeroporti të kontrolluar nga Rusia jashtë qytetit të Kherson në Chornobaivka.
Nuk ka pasur asnjë koment nga ushtria ukrainase apo ruse për shkakun e shpërthimit, por pozicionet dhe pajisjet ruse në Chornobaivka janë goditur në disa raste të mëparshme. Javën e kaluar, ushtria ukrainase tha se forcat ruse ishin tërhequr drejt Chornobaivka pasi pësuan humbje të mëdha.
Sipas Volodymyr Zelenskyt, humbjet e Rusisë që nga fillimi i pushtimit të Ukrainës janë një “makth” për Kremlinin.
Në një fjalim të shtunën vonë në mbrëmje, presidenti ukrainas tha se ushtria ruse kishte humbur rreth 23,000 burra , ndërsa më shumë se 1,000 tanke ruse dhe rreth 2,500 automjete ushtarake ishin shkatërruar.
Ndërkohë sipas konfirmimit të fundit nga Moska, Rusia pranon se ka humbur 1351 ushtarë. Në një deklaratë të lëshuar të shtunën, Ministria ruse e Mbrojtjes tha se forcat ruse kishin shkatërruar 2,600 tanke dhe automjete të blinduara ukrainase, 142 avionë, 112 helikopterë dhe më shumë se 650 drone, ndërsa vlerësuan viktimat ukrainase në më shumë se 23,000 trupa.
Zelensky theksoi se “pushtuesit po mbledhin forca shtesë për sulme të reja kundër ushtrisë ukrainase në pjesën lindore të vendit”, duke theksuar forcat ruse po forcojnë prezencën e tyre rreth Kharkivit.
