Me datë 25 prill drejtori i komanduar i burgut të Reçit, Ervis Zika u arrestua nga Shërbimi i Kontrollit të Brendshëm të Burgjeve
Ndërkohë që ditën e sotme Gjykata e shkallës së parë ka dhënë masën “arrest shtepie” Zikën. Përveç Zikës në hetim janë dhe punonjës të tjerë në këtë institucion të vuajtjes së dënimit. Pala mbrojtese kërkoi një masë lehtësuese për faktin se drejtori i burgut nuk përbën rrezikshmëri për ikjen nga vendi.
Hetimi ndaj drejtorit të burgut te Reçit do vijojë në kushtet e arrestit të shtëpisë. Vendimi u dha nga gjyqtarja e shkallës së parë në Shkodër Izabela Radovani ndërsa prokurore e çeshtjes ishte Shqiponja Milla.
Kujtojmë që akuzat që bien mbi Zikën lidhen me faktin se ai ka shpërdoruar detyrën, duke futur sende të ndaluara në ambientet e vuajtjes së dënimit. Gjithashtu ai akuzohet edhe për vjedhje të karburantit,përmes firmosjes së kartelave fiktive. Për abuzim me karburantin po hetohen edhe ish-zyrtarë të tjerë.
Urdhri për arrestimin është dhënë nga prokuroria e Rrethit Gjyqësor Shkodër. Vlen të përmendim se arrestimi i Zikës, vjen pas disa ngjarjeve ndodhura më parë në këtë burg, që në kohën kur drejtohej nga Maliq Meta, i cili është shkarkuar nga posti i drejtorit të Burgut të Reçit në Shkodër, më 12 janar të këtij viti.
