Ngjarja e ndodhur pasditen e djeshme në Rinas, ku u grabitën 10 mln euro ka qenë padyshim një nga më të rëndat dhe për këtë arsye ka reaguar edhe ish-presidenti, Bujar Nishani.
Nishani përmes një statusi në rrjetin e tij social, Facebook, ka folur rreth çështjes dhe duket se nuk është shumë optimist me punën që policia është duke bërë.
Sipas tij, Policia është duke i hedhur tym publikut me historinë e përplasjes me armë zjarri me bandën, madje shkon deri aty sa e quan “po aq kriminale sa edhe grabitja”.
Grabitja sipas tij padyshim që është një ngjarje shumë e rëndë, por ndërkohë ka treguar se bandat dhe terroristët në vend, nuk kanë më frikë nga askush, pasi nuk janë marrë masa për disa grabitje spektakolare të cilat kanë ndodhur në mes të ditës.
“Një qeverisje e ardhur nga krimi pjell vetëm krim, bashkëjeton vetëm me krimin dhe prodhon veç terror”, e ka mbyllur postimin e tij, ish-presidenti Nishani.
Statusi i Nishanit:
Tentativa për ti hedhur tym publikut me gjoja “shkëmbime zjarri” nga policia me bandën terroriste që grabiti avionin Austrian Airlines, është po aq kriminale sa grabitja e miliona parave prej bandës, që tashmë do të paguhen nga taksat e njerëzve të thjeshtë.
Nëse do të kishte patur një shkëmbim zjarri, ai do të kishte ndodhur përpara se banda të mbërrinte tek avioni.
Por në fakt ky nuk është problemi i vërtetë e më madhori.
As ai i mosmarrjes së masave pas disa grabitjesh spektakolare në mes të ditës, e në mes të kryeqytetit.
Këto probleme mbeten në hije nga thelbi i revanshit të krimit dhe terrorit.
Çështja themelore është sepse bandat dhe terroristët e këtij lloji siç ishte dhe ai i fundit, nuk kanë frikë nga askush.
As nga shteti, as nga ligji, as nga policia, as nga ruajtja e as nga siguria.
Sepse ata askush nuk i ndjek, askush nuk i heton, askush nuk i shqetëson, askush nuk i turbullon.
Një qeverisje e ardhur nga krimi pjell vetëm krim, bashkëjeton vetëm me krimin dhe prodhon veç terror.
