Kina raportoi këtë të hënë vdekjen e tre personave në Shanghai si pasojë e Covid, për herë të parë qëkur ky vend futi në fuqi karantinën në fund të marsit. Sipas autoriteteve atje, viktimat ishin të moshës nga 89 deri në 91 vjeç dhe të pavaksinuar.
Zyrtarët e Shangait thanë se vetëm 38% e banorëve mbi 60 vjeç janë plotësisht të vaksinuar.
Qyteti tani do të hyjë në një raund tjetër testimi masiv, që do të thotë se një bllokim i rreptë do të vazhdojë në javën e katërt për shumicën e banorëve.
Deri më tani, Kina kishte pohuar se askush nuk vdiq nga Covid në qytet, një pretendim që është vënë gjithnjë e më shumë në pikëpyetje.
Vdekjet e ditës së sotme ishin gjithashtu vdekjet e para të lidhura me Covid që u pranuan zyrtarisht nga autoritetet në të gjithë vendin që nga marsi 2020.
Sistemi i kodit shëndetësor të Kinës klasifikohet sipas tre ngjyrave: jeshile, e verdhë dhe e kuqe. Jeshile do të thotë se nuk ka kufizime, e verdha do të thotë që personi duhet të izolohet për shtatë ditë dhe e kuqja do të thotë që kërkohet një periudhë izolimi 14-ditore. Kodet caktohen në bazë të transmetueshmërisë së Covid në komunitet dhe kontakteve të ngushta në çdo kohë të caktuar.
Këto politika u miratuan fillimisht në distriktin Shangyu të provincës Zhejiang të Kinës Juglindore nëpërmjet një njoftimi të ngjashëm më datë 2 janar, dhe që atëherë janë zbatuar në qytete të tjera kineze, veçanërisht Shenzhen, një nga qendrat më të mëdha të teknologjisë në Kinë dhe qytetet më të rëndësishme për nga aspekti ekonomik.
