Marine Le Pen, ka bërë një deklaratë delikate, teksa më 24 prill pritet të përballet sërish me Emmanuel Macron në raundin e dytë të zgjedhjeve presidenciale në Francë.
Ajo tha se mbështet gjerësisht sanksionet kundër Rusisë, por jo kur bëhet fjalë për furnizimet me naftë dhe gaz.
Në një intervistë për France Inter Radio, ajo tha se nuk dëshiron që populli francez “të vuajë pasojat e sanksioneve” për naftën dhe gazin.
Franca, si shumë vende të tjera evropiane, importon një pjesë të madhe të gazit të saj natyror përmes tubacioneve nga Rusia, duke e përdorur atë për energji rezidenciale dhe komerciale.
Le Pen, e cila do të luftojë Emmanuel Macron për presidencën në balotazhin e 24 prillit, është kritikuar nga rivalët për mbështetjen e saj në të kaluarën për Rusinë dhe Presidentin Vladimir Putin.
Ajo dukej se mbështet aneksimin e Krimesë nga Rusia në 2014, por e përshkruan pushtimin aktual si një situatë të ndryshme.
Vladimir Putin, që përcakton pagesën e gazit natyror rus përmes rublave ka shkaktuar mëdyshje tek shumë blerës të gazit.
Katja Yafimava, një hulumtuese e lartë në Institutin Oxford për studimet energjetike të programit të gazit natyror, për Anadolu Agency (AA) tha se ajo konsideron se sistemi i ri i pagesave nuk është detyrimisht kontradiktor me kontratat ekzistuese të furnizimit me gaz.
Ajo argumenton se sipas sistemit të ri të pagesave, blerësit evropianë do të vazhdojnë të paguajnë në euro, megjithëse dekreti ka mandatuar disa hapa shtesë që duhet të ndërmerren nga ‘Gazprombank’ që pagesa të konsiderohet e përfunduar, respektivisht konvertimi i euros në rubla dhe transferimi i tyre pasues në llogarinë e kompanisë ‘Gazprom’.
