Ditën e sotme kryeministri Edi Rama përgjatë vizitës në godinën e re të Drejtorisë Rajonale të Shërbimeve të Transportit Rrugor në Berat, u mundua të justifikojë investimet në fasada dhe ndërtime të reja, ndërkohë që vendi është përfshirë nga kriza ekonomike dhe çmimet e produkteve të ‘shportës bazë’ janë shumë të larta.
Ai bëri një paralelizëm midis fasadave dhe arsyeve pse njerëzit lahen, krihen apo vishen, duke u munduar të argumentojë pse investimet e qeverisë në fasada, në këtë periudhë nuk janë pa arsye.
“Atyre që akuzojnë për ndërtimet e reja dhe fasadat, u duhet thënë: Pse laheni? Pse kriheni? Rrini pa larë! Pse qepeni? Pse visheni? Rrini siç ju ka bërë nëna edhe s’ka problem”, u shpreh Rama duke ironizuar kritikat që i adresohen qeverisë.
Kreu i qeverisë nuk i kurseu “thumbimet” kur tha se nëse pyesin se ku është rritja ekonomike e vendit, këto janë faktet që e dëshmojnë.
“Mjete me standarde të reja duke nxjerrë jashtë shumë nga mjetet e vjetra dyfishimi flet vetë, thonë ku është rritja ekonomikë, faktet e tregojnë se ku është”, tha kryeministri.
Nga ana tjetër, Balluku ndërsa tregonte godinën tha se kjo është një mundësi shumë e mirë që i jepet Beratit, duke e cilësuar si një kompleks model në hyrje të qytetit, në shërbim me kushte optimale, shpejtësi e transparencë për 55 mijë drejtues automjetesh.
