Shqiptarët po jetojnë një periudhë të vështirë të jetës së tyre për shkak se kriza ekonomike ka tkurrur xhepat e qytetarëve të thjeshtë. Çmimi i naftës ndërron thuajse çdo ditë duke kapur shifra rekord, ndonëse bursa tregon shifra të vogla krahasuar me atë që karburantet në Shqipëri e shesin tek qytetarët.
Jo vetëm nafta, por çmim marramendës kapin edhe produktet e konsumit. Një familje shqiptare me një rrogë mesatare tejet të ulët blen produktet e shportës me një çmim të lartë. Sipas kryeministrit Edi Rama rritja e çmimeve dhe kriza ekonomike në vend vjen si pasojë e luftës Ukrainë-Rusi.
Ndonëse çmimet janë stratosferë për popullin që mezi siguron bukën e gojës, Bashkia në Durrës nuk po e ndjen aspak krizën ekonomike. Themi këtë sepse projekti kontrovers “Veliera” jo vetëm që nuk ka përfunduar, por po vazhdon ende të rrjepë para nga taksapaguesit durrsak të qytetit bregdetar. Mësohet se Bashkia e Durrësit, i ka shtuar projektit edhe një fond prej 1.8 miliardë lekësh të vjetra. E gjithë kjo shumë e nxjerrë nga buxheti i bashkisë do të përdoret për mbulimin e Velës.
Edhe pse ky fond mund të shpenzohej për të ndihmuar një pjesë të qytetarëve që nuk kanë çfarë të hanë, ku të rrinë apo me çfarë të vishen, pra në dobi të durrsakëve, Bashkia e Durrësit po i jep miliardat për një projekt që vlerësohet si negative për komunitetin e qytetit bregdetar.
