Disa ditë më parë kuzhinieri i njohur Indrit Çela u dhunua brutalisht, në sy të bashkëshortes.
Autorët janë dy vëllezër, Ernest Luka dhe Donald Luka nga fshati Derven, ku njëri prej tyre është arrestuar dhe tjetri është shpallur në kërkim.
Ndërkohë që detaje të reja kanë dalur nga ngjarja e ndodhur në Fushë-Krujë.
Sipas Lukës, një prej autorëve që dhunuan Çelën tregon se shkak për ngjarjen është bërë një konflikt i pesë muajve më parë mes dy vëllezërve dhe kunatit të kuzhinierit, me të cilin janë përplasur fizikisht për shkak të një parakalimi makinash.
“Po e pranoj. Unë dhe im vëlla e rrahëm Indritin. E rrahëm se kishin një konflikt të hapur me të dhe me kunatin e tij, me të cilin disa muaj më parë u përplasëm fizikisht për shkak të një parakalimi makine. Sapo e pamë se Indriti ishte duke lëvizur me makinë, iu afruam dhe i bllokuam rrugën dhe më pas e rrahëm. Për fatin e tij të mirë ndërhynë disa udhëtarë të tjerë që u ndodhën në ato momente në vendin e ngjarjes”, ka deklaruar mes të tjerash 24-vjecari, i cili u vu në pranga disa orë pas ngjarjes pas një operacioni antidrogë në shtëpinë e tij.
Ndërkohë, policia po vazhdon kërkimet për arrestimin e Donald Lukës që vazhdon të jetë në kërkim policor.
Theksojmë se janë kryer kontrolle në zonë por edhe në kryeqytet, ku mendohet të jetë fshehur 27-vjecari, po pa rezultat.
