Ukraina po përjeton javën e tretë të tmerrit të luftës, mes bombardimeve dhe viktimave.
Ndërkohë edhe pse janë zhvilluar disa faza negociatash midis Rusisë dhe Ukrainës, akoma nuk dihet nëse mund të kemi një armëpushim të mundshëm.
Putin ka urdhëruar forcat e parandalimit bërthamor të Rusisë që të jenë në gatishmëri të lartë dhe ministri i Jashtëm, Lavrov gjithashtu ka paralajmëruar se “Lufta e Tretë Botërore mund të jetë vetëm një luftë bërthamore”.
Ivan Federov drejtoi qytetin juglindor derisa ra në duart e forcave pushtuese ruse dhe ai u rrëmbye gjashtë ditë më parë.
Kryebashkiaku i Melitopolit, qytet që tashmë është nën kontrollin e rusëve, është shprehur për rrëmbimin e tij nga pushtuesit.
Federov tha se trupat ruse e morën atë nga zyra e tij pa asnjë fjalë dhe se ai nuk kishte asnjë lidhje me botën e jashtme ndërsa ishte në paraburgim.
Ai tha se ishte mbajtur në një dhomë të vogël me ushtarë të armatosur, por asnjëherë nuk ishte lënduar fizikisht.
Forcat okupuese në Melitopol e kanë zëvendësuar Federovin me kryebashkiakun e tyre. Por ai këmbëngul se pasardhësi i tij nuk është kreu i ligjshëm i pushtetit vendor, pasi ai u votua nga më shumë se 60% e njerëzve.
Kryebashkiaku u lirua të mërkurën pasi Ukraina tha se kishte rënë dakord të shkëmbente nëntë ushtarë rusë të kapur rob për ta kthyer atë.
