Pas polemikave për mungesën e sanksioneve, “Air Serbia” tërhiqet dhe redukton fluturimet drejt kryeqytetit rus. Putin nënshkruan vendimin kundër kompanive të qiradhënies së avionëve
Theksojmë që që nga fillimi i sulmit mbi dy javë më parë, AirSerbia ka dyfishuar numrin e fluturimeve drejt kryeqytetit rus duke vendosur në dispozicion avionë më të mëdhenj drejt atij që është bërë destinacioni i saj më fitimprurës.
Përveç disa transportuesve turq, linja ajrore e Serbisë është e vetmja kompani evropiane që vazhdon me fluturimet drejt Rusisë që nga shpallja e ndalimit të fluturimeve ndërkombëtare lidhur me sulmin në Ukrainë. Vendimi i autoriteteve serbe shkaktoi kritika si nga Bashkimi Evropian ashtu edhe nga Ukraina.
Para disa ditësh presidenti i Serbisë, Alleksandar Vuçiq, prezantoi konkluzat e arritura në Këshillin e Sigurisë Kombëtare të Serbisë, lidhur me krizën në Ukrainë.
Duke lexuar konkluzat, Vuçiq tha se Serbia nuk do të vendosë sanksione ndaj Rusisë për momentin, sepse ajo “udhëhiqet nga interesat e saj jetike ekonomike dhe politike”.
“Serbia respekton normat e së drejtës ndërkombëtare, por Serbia gjithashtu i kupton mirë nevojat e saj dhe pavarësisht se çfarë do të donte dikush, Serbia ka interesat e saj jetike kombëtare dhe shtetërore. Ajo respekton miqësitë tradicionale”, tha ai.
Kujtojmë që ditën e sotme, Ukraina futet në javën e tretë të luftës, dhe ende nuk ka shpresa paqeje nga ana e Rusisë.
Që herët në mëngjes, bombardimet ruse shenjestruan dy pallate në Kiev, duke lënë disa persona të plagosur. Edhe në qytetet jugore të Odesa dhe Zaporizhzhia pati shpërthime të shumta.
