Ukrainë është në ditën e saj të 14-të të tmerrit, që prej fillimit të sulmeve ruse.
Ndërkohë për të lejuar civilët të arratisen përmes korridoreve humanitare, ushtria ukrainase ka rënë dakord për një armëpushim 12-orësh me Rusinë.
Zëvendëskryeministrja e Ukrainës, Iryna Vereshchuk, bëri të ditur lajmin dhe shtoi se kryeministri Denys Shmygal do të bisedojë me Komitetin Ndërkombëtar të Kryqit të Kuq rreth rrugëve të propozuara për armëpushimin, i cili zgjat nga ora 9 e mëngjesit deri në 21:00 sipas kohës lokale.
“Banorët e Volnovakha-s kthehen nga unë dhe më kërkojnë që të përmbush premtimin e Federatës Ruse sot, njerëzit duhet të jenë në gjendje të largohen nga vendet ku tani fshihen nga breshëri i GRAD-ve [raketave] dhe zjarri shkatërrues që është duke i vrarë ata”, u shpreh Vereshchuk. Gjithashtu ajo tha se do të ketë gjithashtu një operacion special për evakuimin e një jetimoreje pranë Kievit, në periferi të Vorzel. Ajo tha se atje ishin 55 fëmijë dhe 26 anëtarë të stafit.
Vereshchuk tha se armëpushimi do të lejonte civilët të arratiseshin përmes “korridoreve të gjelbërta” në zonat e mëposhtme:
Zonat që konsiderohen si “korridore” të gjelbërta:
-Energodar-Zaporizhia
-Sumy-Poltava
-Mariupol-Zaporizhia
-Volnovakha-Pokrovsk
-Izium-Lozova
-Vorzel, Bucha, Irpin, Borodyanka, Gostomel-Kiev
Guvernatori rajonal i Sumy, Dmytro Zhyvytskyi thotë se Rusia bombardoi një zonë banimi në veri-lindje të qytetit gjatë natës, duke e përshkruar incidentin si “vrasje masive”.
Nëntë persona në një shtëpi u vranë. Gjashtë shtëpi u shkatërruan plotësisht dhe rreth 20 të tjera u shkatërruan pjesërisht.
