Në një dokumentar investigativ të publikuar së fundmi nga televizioni shtetëror italian “Rai”, është zbuluar një skandal që lidh një prej njerëzve më të frikshëm të mafias italiane, me një ish-ministër kosovar.
Bëhet fjalë për anëtarin e klanit mafioz ‘Ndrangheta, Antonino Vadala, i cili në disa përgjime telefonike, ka treguar sesi ka udhëtuar me avionin e një ish-ministri kosovar.
Kaq ka qenë informacioni i publikuar nga gazetarja Maria Grazia Mazzola në lidhje me këtë çështje, ndërkohë që pritet që të nisin hetime të thelluara për të zbardhur më tej skandalin.
Në përgjime, Vadala, i cili është arrestuar një vit më parë në Sllovaki për trafik të sasive të mëdha të lëndëve narkotike, tregon sesi me një milion euro ka blerë doganat, Shërbimin Informativ, Ministrinë e Brendshme, Ministrinë e Financave dhe policinë sllovake.
Sipas gazetares, e dashura e mafiozit Vadala ishte asistente e parlamentit dhe e ish-kryeministrit sllovak Robert Fico, çka ngre dyshime se ajo shërbente si urë mes dy palëve.
Përgjimet kanë shkaktuar një furtunë të vërtetë në Slllovaki dhe kjo pritet të ndodhë dhe në Kosovë.
