Vrasja e bujshme në Shkodër ku kanë mbetur të vrarë vëllezërit Bilali ka bërë që të ndodhë një shkarkim i rëndësishëm në Policinë e Shkodrës.
Duke folur për rastin, nga studio e “A Show”, ka qenë vet Drejtori i Përgjithshëm i Policisë së Shtetit, Ardi Veliu që ka folur rreth çështjes duke sqaruar kështu edhe ikjen e Velbi Bushatit nga posti i Drejtorit të Policisë së Shkodrës.
Sipas Veliut, Shkodra është një nga qarqet më problematike në vend sa i përket krimit ndërkohë që ikja e Bushatit sipas tij mund të jetë një impuls i mirë.
“Ajo që ndodhi në Shkodër është një ngjarje e rëndë, pavarësisht masave të marra. Policia atje gjatë 2018 ka qenë shumë prezante, është një nga qarqet ku ka ndërthurje të grupeve kriminale dhe fenomenit të gjakmarrjes.
Nëse i referohem statistikave dua të jem konkret. Themi situatë të rënduar, por përqindja e veprave penale të evidentura në Shkodër në 2018 është vetëm 7%, krahasuar me gjithë Shqipërinë. Drejtori lëvizi për shkakun se duam t’i japim një impuls tjetër, për një ritëm tjetër. Do bëjmë edhe ndryshime të tjera, edhe në Elbasan”,- tha Veliu
