Një tjetër shkarkim i rëndësishëm ka ndodhur në Policinë e Shkodrës dhe këtë herë radha ka qenë e shefit të komisariatit të qytetit, Vasil Çela. Kjo valë ikjesh ka lidhje të drejtpërdrejtë me vrasjen e Astrit dhe Brahim Balilit ditën e shtunë, prej nga u shkarkua edhe Drejtori i Policisë, Vehbi Bushati.
Nga njoftimet e para tashmë mësohet edhe emri i zëvendësuesit të shefit të komisariati dhe bëhet fjalë për Lorenc Metën.
Ky shkarkim i dytë i shefit të komisariatit nuk mendohej, por në një farë mënyrë mund të ishte i pritshëm, pas deklaratës që Ministri i Brendshëm, Sandër Lleshaj ka bërë gjatë shkarkimit të Bushatit:
“Për t’i dhënë një impuls të ri kemi vënë në Policinë e Shkodrës Niko Brahimaj në vend të Vehbi Bushatit. Erdha në Shkodër për këtë arsye por edhe për ngjarjen e rëndë të ndodhur. Është vrasje për larje hesapesh në Shkodër. Forcat e policisë po bëjnë maksimumin për ta zbardhur ngjarjen”,- deklaroi Lleshaj nga Shkodra.
