Para 4 ditësh në Shijak të Durrësit u zbulua dhe më pas u shkatërrua një laborator që prodhonte ‘Bitcoin’. Pas kësaj erdhi arrestimi i tre personave. Ndërkohë sot, 4 ditë pasi u shkatërrua laboratori i “Bitcoin” në Shijak të Durrësit, gjykata ka vendosur të lirojë 3 të arrestuarit. Gjykata ka vendosur masa “Detyrim paraqitje” për Rramush Dumanin, Ardian Çekiçin dhe Liserxhio Xhaferrajn. Personat, të cilët janë nga Tirana, e kthyen ambientin në fjalë në një laborator të prodhimit të kriptovalutave.
Pas informacioneve të ardhura në rrugë operative, Policia e Durrësit zbarkoi në një operacion të mirëmenduar dhe brenda gjeti aparaturat që përdoren për prodhimin e kriptomonedhave. Si rezultat u gjetën dhe u sekuestruan një numër prej 210 makinerish që prodhojnë valutat virtuale. Përmes fotove dallohen aparaturat që janë në funksion të prodhimit. Enxhi Hasani është administrator i firmës ku u gjet laboratori i prodhimit të kriptomonedhave në Shijak. Ai ka deklaruar se ka një kontratë të rregullt për këtë laborator dhe se asnjë kod penal nuk parashikon ndalimin e prodhimit të bitcoin apo kriptomonedhave të tjera.
NJOFTIMI I POLICISE
Finalizohet operacioni policor i koduar “KRIPTOFARM”, i zhvilluar nga Njësia C për Hetimin e Krimeve Kibernetike në Departamentin e Policisë Kriminale në Policinë e Shtetit në bashkëpunim me Drejtorinë Vendore të Policisë Durrës
Evidentohen dy laboratorë për prodhimin e kriptovalutës.
Sekuestrohen qindra pajisje që shërbenin për prodhimin e kriptovalutës me vlerë 1 mln euro, të cilat ishin në gjendje pune në dy struktura.
