Ditën e sotme do të mblidhet Komiteti Teknik i Ekspertëve, pas rritjes së rasteve në vendin tonë me Covid-19. Mbledhja e Komitetit të Ekspertëve do të zhvillohet në orën 10:30, ndërsa nuk dihet nëse do të informohen masa të reja anti-Covid apo do të vijojnë të mbeten në fuqi ato që janë aktualisht.
Java e fundit ka shënuar një rritje rekord infektimesh, që nga fillimi i pandemisë në vendin tonë, kjo edhe për shkak të mbërritjes së variantit më të transmetueshëm të Covid-19, Omicron.
Kujtojmë se një ditë më parë Ministria e Shëndetësisë tregoi se janë 1905 qytetarë të infektuar dhe 6 humbje jete në 24 orët e fundit. Ky eshte bilanci i covid-19 ne vendin tone.
Aktualisht në spitalet COVID po marrin trajtim 117 pacientë, nga të cilët 17 janë në gjendje më të rënduar. Në 24 orët e fundit me gjithë përpjekjet e stafit mjekësor ka gjashtë humbje jete me SARS-COV2 pozitiv: një qytetar nga Lushnja 60 vjeç, një qytetar nga Elbasani 72 vjeç, dy qytetarë nga Tepelena të moshave 74-81 vjeç, dy qytetarë nga Tirana të moshave 82-84 vjeç.
Ministria e Shëndetësisë i bën apel qytetarëve të vaksinohen sa më parë, për të mbrojtur veten dhe shëndetin e të tjerëve.
Çdo qytetar mbi 16 vjeç, mund të vaksinohet në qendrën shëndetësore ose në pikën më të afërt të vaksinimit të përqëndruar.
Vaksinimi është i hapur edhe për fëmijët +12 vjeç me probleme të sistemit imunitar, me rekomandim nga mjeku.
