Ditën e fundit të këtij viti, Ministrja e Shëndetësisë ka bërë të ditur lajmin se 375,000 doza të vaksinës Pfizer kanë mbërritur në Shqipëri, dhuratë nga Bashkimi Europian. Manastirliu shprehet se miku i mirë njihet në ditë të vështira dhe se kjo është një tjetër dëshmi e solidaritetit që na bashkon.
“Miku i mirë njihet në ditë të vështira
Përgjatë gjithë këtyre 21 muajve të pazakontë në përballjen me pandeminë, mbështetja e miqve tanë të Bashkimit Europian ka qenë e pakursyer.
Kanë mbërritur në orët e mbrëmjes në #IShP 375,000 doza të vaksinës Pfizer, një tjetër dëshmi e solidaritetit që na bashkon e na bën më të fortë 🇦🇱 🤝 🇪🇺
#Vaksinohu
#VaksinatShpëtojnëJetë🙏🏼”, shkruan Manastirliu.
Kujtojmë që Ministria e Shëndetësisë ka publikuar dje shifrat e fundit të rasteve të reja dhe viktimave të regjistruar nga infektimi me Covid. Mësohet se gjatë 24 orëve të fundit, në vendin tonë nga 5482 testime, 617 kanë rezultuar pozitive. Gjatë ditës së fundit janë shënuar 3 humbje jete.
Janë 5836 pacientë aktivë me COVID19 në të gjithë vendin. Aktualisht në spitalet COVID po marrin trajtim 92 pacientë, nga të cilët 13 janë në gjendje më të rënduar. Me gjithë përpjekjet e mjekëve, në 24 orët e fundit ka 3 humbje jete me SARS-COV2 pozitiv: dy qytetarë nga Tirana të moshave 65-67 vjeç, një qytetare nga Elbasani 75 vjeç. Ministria e Shëndetësisë dhe Mbrojtjes Sociale u shpreh ngushëllimet familjarëve. Janë shëruar 284 qytetarë gjatë 24 orëve të fundit, duke e çuar numrin e të shëruarve në 200,465 që nga fillimi i epidemisë.
