Mbrëmjen e sotme mjeku imunolog Genc Sulçebe ka deklaruar se një dozë e tretë e vaksinës anti-Covid rrit mbrojtjen imunitare, ndaj variantit Omicron. I ftuar në emisionin ‘Open’ në ‘Top Channel’, Sulçebe ka thënë se si vend jemi në nivel të përgjithshëm imuniteti, ndërkohë që mjeku Pëllumb Pipero është shprehur se mund të infektohesh edhe nëse je vaksinuar.
Sulçebe: Në shifrat tona, gjetëm në Tiranë dhe Berat që 50% raportonin se ishin infektuar. Pra përqindja e popullatës që është infektuar tek ne është më e lartë. Kësaj përqindje i mbivendoset dhe përqindja e vaksinimit. Jemi në një nivel të përgjithshëm të imunitetit. Duhet të keni parasysh një gjë, imuniteti është shumë kompleks. Pra ky imunitet qoftë kolektiv apo individual të mbron dhe nga Omicroni megjithëse është varianti më i ndryshëm deri tani. Por këtu hyn dhe roli i dozës së tretë që rrit në mënyrë të lartë mbrojtjen imunitare.
Pipero: Askush nga ne nuk thotë nuk infektohet nëse je vaksinuar. Mundësia për tu sëmurur është thuajse inekzistente por jo se mbrohemi nga infektimi.
Gjithashtu Pipero tha:
“Ne nuk mund të themi që brenda një grupi, njëri është më shumë pak më pak agresiv. Klinikisht Omicroni paraqitet më i lehtë. Se si do të vijojë do ia lëmë kohës. Studimet e deritanishme janë kontradiktore, praktikisht, studimet janë konfuzione mbi evidenca sesa studime të mirëfillta. Një gjë është e sigurt, së pari, transmetueshmëria e Omicronit është shumë herë më e madhe se e Deltës. Ky virus i shmanget dukshëm mburojës imunitare edhe asaj natyrales dhe vaksinës. Për këtë arsye ka diskutim të shkencëtarëve sot në botë. Prandaj themi që një person që e ka kaluar virusin para 3-4 muajsh apo ka bërë vaksinën para 3-4 muajsh e ka më të vështirë të infektohet sepse e detektojnë shpejt virusin dhe nuk e lënë të hynë në qelizë. Këtë kemi bërë bisedë me mjekun para disa ditësh në oborrin e spitalit.”
