Pas patronazhistëve tashmë zbulohet një tjetër skandal me të dhënat personale të qytetarëve shqiptarë.
“Opinion.al” zbulon se në “WhatsApp” po shpërndahet një databazë me të dhënat e qytetarëve të punësuar në sektorin privat dhe publik, shoqëruar me kartat e tyre të identitetit, pozicionin e punës dhe rrogën përkatëse.
Portali në fjalë raporton se nuk dihet burimi i kësaj liste që posedon, por lista nuk do të publikohet me qëllim ruajtjen e privatësisë së personave në fjalë.
Në listë janë qytetarë të punësuar jo vetëm në sektorin publik por edhe atë privat, të shoqëruar me kartat e tyre të identitetit.
Kujtojmë që “Patronazhistët” përmes kontakteve, telefonatave apo të njohurve të përbashkët krijonin një ide të përafërt të bindjeve politike të secilit prej qytetarëve që kishin në ngarkim.
Por misioni i patronazhistëve ishte akoma më i gjerë se kaq, pasi jo vetëm duhet të identifikonin zgjedhësit dhe preferencat e tyre politike, por duhet të raportonin gjithçka ditën e zgjedhjeve.
Patronazhistët duhet të vepronin në dy grupe. Ata që kanë aftësi teknike, do të përdornin një aplikacion, ku do të kishin listën me të gjithë votuesit e PS që patronazhisti kishte në ngarkim.
Detyra e patronazhistit me aplikacion ishte që të raportonte në kohë reale ditën e votimit mbi statusin e secilit votues, pra nëse votuesi kishte shkuar në qendrën e votimit apo jo. Patronazhistët e grupit të dytë, apo ata që nuk kanë aftësi teknike, do të punonin me lista në mënyrë manuale duke raportuar tek i deleguari i partisë në kohë reale për statusin e votuesve të PS që kishin në ngarkim
