Eugena Tomini është liruar nga detyra si zëvendësministre e Shëndetësisë. Në vendimin e Këshillit të Ministrave gjatë mëngjesit të sotëm, Tominit i është besuar një tjetër detyrë
Ajo është emëruar drejtoreshë e Institutit të Shëndetit Publik, duke zëvendësuar kështu Albana Ficon.
Kjo e fundit, pak ditë më parë u emërua drejtoreshë e QSUT-së. Lajmin e bëri të ditur Ministrja Ogerta Manastirliu disa ditë më parë.
“Prof. Albana Fico emërohet në drejtimin e QSUT-së, për të çuar përpara projektet e mëdha të modernizimit të qendrës më të madhe spitalore në vend. Faleminderit Enkelejdi Jotit për punën në këto vite jo të lehta”, thekson Manastirliu.
Ajo ka mbajtur më herët postin shefe e Survejancës dhe Shërbimit të Inteligjencës Epidemiologjike në ISHP.
Postin e zëvendes ministres Eugena Tomini e mori në janar të këtij viti.
Kjo lëvizje erdhi në kohën kur vendi është nën ndikimin e pandemisë së koronavirusit, gjë e cila duket se e shtyu qeverinë të forcojë drejtimin e Shëndetësisë si pjesë e strategjisë për përballimin e kësaj situate.
Tomini nuk zëvendësoi asnjë prej zv.ministrave, por iu shtua ekipit prej tre zëvendeësministrash, në krah të ministres së shëndetësisë Ogerta Manastirliu.
Eugena Tomini e ka mbajtur këtë pozicion krahas Mira Rakacolli, Bardhylka Kospiri dhe Albert Nikollës.
