Dy javë më parë kreu i Policisë së Shtetit Gledis Nano mori vendimin që të gjithë punonjësit e policisë t’i nënshtrohen testit të drogës.
Tashmë po vijon testi i drogës për punonjësit e policisë, ku deri më tani janë kryer rreth 1 mijë testet e para. Faza e parë e testimit të policëve, të cilët janë përzgjedhur nga vlerësimi i eprorëve dhe SHÇBA, pritet të përmbyllet brenda muajit dhjetor. Nga testimet e kryera deri më tani, rreth 30 efektivë policie kanë dalë me rezultate mbi normën e lejuar.
Ndërkohë, për të saktësuar rezultatet, pritet të ribëhen testet për të saktësuar nëse rezultatet janë mbi normë për shkak të përdorimit të drogës apo si efekt anësor i përdorimit të medikamenteve të ndryshme.
Pas kryerjes së dy testeve, analizat do të verifikohen nga një ekip mjekësor pranë Drejtorisë së Përgjithshme të Policisë dhe nëse rezulton se punonjësi i policisë është konsumator droge, atëherë standardet profesionale do të nisin ecuri të rëndë disiplinore për punonjësin, gjë e cila sjell përjashtimin e tij nga policia.
Duke evidentuar këto shifra shqetësuese të policëve që konsumojnë lëndë narkotike nga testimet që janë bërë deri më tani, shikohet si domosdoshmëri aplikimi i testit të drogës edhe tek punonjësit e administratës së shtetit.
Madje duke qenë se testet edhe mund të manipulohen një metodë efektive do të ishtë përdorimi i qenve të drogës. Kjo metodë tashmë përdoret në Angli, e cila ka vite që përballet me përhapjen e drogës nëpër institucione.
Kryeparlamentari tha disa ditë më parë se do të hetonte kulturën e drogës në Westminster pasi gjurmët e kokainës u zbuluan në një numër vendesh të aksesueshme vetëm për njerëzit me leje parlamentare.
Sipas tij qentë e drogës mund të sillen nëpër korridoret e instititucioneve shtetërore pasi abuzimi me drogën duhet ndaluar dhe aftësia e tyre e nuhatjes do identifikonte lehtësisht përdoruesit.
“Dhoma e Komunave ka një histori të gjatë të përdorimit të qenve nuhatës për të zbuluar eksplozivët,” tha ai. “Mund të ndodhë që ne tani duhet të përdorim aftësinë e tyre dhe për këtë çështje”
Edhe për ekspertin kriminalist, Artan Rexhepi bërja e testit të drogës për administratën do ishte një veprim shumë i mirë.
“Edhe sektorë të tjerë të administratës civile duhet ta bëjnë këtë test. Kjo e policisë është një lëvizje shumë e mirë, një bravo shumë e madhe për policinë. Punonjësi i policisë duhet ta dijë që ai është përpara ligjit i barabartë me të gjithë të tjerët. Shifrat janë shqetësuese. Si mundet një OPGJ të hetojë një rast droge kur është vetë përdorues? Do t’ia sugjeroja ministrit të Drejtësisë që të gjitha dosjet që kanë të bëjnë me drogën, e trajtuara nga policë përdorues droge, të ritrajtohen”, tha Rexhepi.
Para 3 viteve këtë çështje e ngriti edhe ish-drejtor i Arkivës në Ministrinë e Brendshme, Kastriot Dervishi, i cili propozoi që punonjësit e Policisë dhe Administratës shtetërore të bëjnë testin e drogës.
“Doni të dini në çfarë derexheje ka përfunduar ky shtet? Bëni testin e drogës për gjithë oficerët dhe nënoficerët e Policisë së MB-së dhe asaj të burgjeve. Pjesa e specializuar për të luftuar krimin, do t’ju befasojë me raportin që ka me lëndët narkotike. Edhe administrata po ashtu të detyrohet për të bërë testin e drogës. Pastaj vendosni detyrimin e testit të drogës për çdo nëpunësi shtetërore në çdo kohë. Kostoja nuk është asgjë para përfitimit të madh që do të sjellë. Ne që nuk pimë drogë, kemi qenë përballë vendimmarrjeve së konsumatorëve të lëndëve narkotike”, tha asokohe Dervishi.
