Një i burgosur shqiptar i dha fund jetës disa ditë më parë ndërsa ishte duke u transferuar nga spitali i Amfisës në burgun e Malandrinos.
38 vjeçari vari veten me lidhëse këpucësh brenda furgonit të policisë. Ai ishte dënuar për disa vepra të ndryshme penale.
Ndërkohë tani është zbuluar një letër që Adem Rusi ka shkruar në burg,
“Këtë vit mbarova 2 vite gjimnaz dhe duhet të kthehem në qeli dhe përditshmëria ime është shumë e mërzitshme për trurin tim”.
Letra në fjalë është shkruar nga i riu në vitin 2017, ku i kërkonte drejtorit të burgut në Larisa, ku ai ishte në atë kohë, që të vazhdonte shkollën “Shkolla e një mundësie të dytë”.
Kujtojmë se letra në fjalë në atë kohë bëri xhiro në mediat greke, të cilat raportuan kërkesën e të riut, i cili kërkonte që të arsimohej. Mediat greke raportuan se shqiptari i kishte dhënë fund jetës duke u vetëvarur me lidhësen e këpucëve në furgonin e policisë së burgut.
Nga ana tjetër vëllai i viktimës, Shkëlqim Rusi deklaroi sot për mediat vendase se Ademi nuk ishte vetëvrarë, por akuzoi gardianët e burgut për vrasje.
“Unë kisha folur 3 orë para ngjarjes me vëllanë në mënyrë private, më pas më mori në telefon drejtori i burgut dhe më tha se ‘e kemi dërguar në spital për vizitë mjekësore rutinë’. Pastaj më thanë që kishte pirë klorinë dhe pas kthimit nga spitali ‘vari veten me lidhësen e këpucëve’. Kjo për mua është e pa pranueshme është vrasje. Vëllai kishte edhe 2-3 muaj burg që të mbaronte dënimin. Ai ka folur me të gjithë njerëzit dhe askush nuk e beson që është vetëvrasje. Atë e kanë vrarë gardianët ata që e kanë shoqëruar”
