Një ngjarje jo e zakontë ka ndodhur në Vlorë, pasi vetë personat e arrestuar nga policia, më përpara kishin bërë kallëzim se ishin dhunuar nga katër persona.
Ndër 4 personat që sipas pretendimeve të shtetasëve F. Y., 38 vjeç dhe A. Q., 33 vjeç, ishte dhe personi me inicialet E.H, 32 vjeç, i cili realisht në këtë rast ishte vetë viktima.
Shtetasit F.Y dhe A.Q, banues në fshatin Akërni, Vlorë, i kanë vjedhur me dhunë një sasi lekësh shtetasit E. H., 32 vjeç, banues në fshatin Oshtimë, Vlorë.
Dhe për të mbuluar gjurmët e tyre kanë bërë kallëzim penal të rremë dhe kanë kryer veprime për pengimin dhe zbulimin e së vërtetës, duke pretenduar se ishin vjedhur me dhunë nga katër persona të paidentifikuar, midis të cilëve edhe shtetasi.
Njoftimi i plotë i policisë:
Specialistët e Hetimit të Krimit në Komisariatin e Policisë Vlorë arrestuan në flagrancë për veprat penale “Veprime që pengojnë zbulimin e së vërtetës”, “Kallëzimi i rremë” dhe “Vjedhja me dhunë”, kryer në bashkëpunim”, shtetasit F. Y., 38 vjeç dhe A. Q., 33 vjeç, banues në fshatin Akërni, Vlorë, pasi në bashkëpunim me njëri-tjetrin dyshohet se i kanë vjedhur me dhunë një sasi lekësh shtetasit E. H., 32 vjeç, banues në fshatin Oshtimë, Vlorë. Gjithashtu, këta dy shtetas kanë bërë kallëzim penal të rremë dhe kanë kryer veprime për pengimin dhe zbulimin e së vërtetës, duke pretenduar se ishin vjedhur me dhunë nga katër persona të paidentifikuar, midis të cilëve edhe shtetasi.
