Ish-drejtori i Përgjithshëm i Policisë së Shtetit, Ardi Veliu është emëruar në postin e zv. ministrit të Infrastrukturës dhe Energjisë.
Vendimi u mor sot gjatë mbledhjes së Këshillit të Ministrave.
Ardi Veliu u lirua nga posti i Drejtorit të Përgjithshëm të Policisë së Shtetit në 5 tetor të këtij viti, 4 vite pas marrjes së detyrës, duke mos e përfunduar mandatin 5-vjeçar në këtë post. Me anë të një letre që u bë publike nga kryeministri Rama, Veliu tregonte arsyet e largimit, ku kryesorja ishte përkushtimi ndaj familjes dhe fëmijve, të cilëve u kishte munguar për katër vite.
“Ne këto moment kam vendosur të mos kërkoj një mandat tjetër dhe t’ju ofroj dorëheqjen time për t’u përkushtuar më shumë familjes dhe fëmijëve që tani janë ne një moshë delikate e të cilëve ju kam munguar pafund këto katër vite”, argumentoi Veliu.
Ndërkohë pas dorëheqjes së Veliut, Rama shprehu konsideratë të lartë për të dhe e falënderoi drejtorin e përgjithshëm të Policisë së Shtetit për kontributin e vyer.
“Me konsideratën më të lartë për ndershmërinë, profesionalizmin dhe përkushtimin e posaçëm të Drejtorit të Përgjithshëm të Policisë së Shtetit, Ardi Veliu, dhe me bindjen se ai ka akoma shumë për t’i dhënë shtetit në detyra të tjera, e falenderoj nga zemra për kontributin e vyer”, u shpreh aso kohe Rama.
