Një tjetër atentat me armë zjarri ka ndodhur mbrëmjen e sotme në Elbasan ku një person ka mbetur i vdekur.
Mësohet se ngjarja ka ndodhur rreth orës 19:15 në një lokal në qendër të qytetit.
Sipas raportimeve të para mësohet se personi i cili ka mbetur i vrarë është avokati Ravik Gurra, i cili njihet shumë mirë, pasi ka ndjekur një nga çështjet më të përfolura në vend, atë “Shullazi” dhe i Çapajve, të njohur për hasmërinë me fisin Beqiri.
Pra konkretisht Gurra ka qenë avokati i Emiliano Shullazit dhe i familjes Çapaj.
Ende nuk dihet nëse ky fakt ka lidhje me ngjarjen, megjithatë në vendngjarje tashmë kanë mbërritur forcat e policisë dhe janë duke hetuar për shkaqet.
Ky është atentati i katërt i ndodhur ku një person ka mbetur i vdekur, i fundit ka qenë vetëm para dy ditësh në Shkodër, ku i vdekur ka mbetur Ferdinand Polia.
Njoftimi i Policisë
Rreth orës 19:35, në një lokal në Elbasan, nga persona ende të paidentifikuar është vrarë me armë zjarri shtetasi R.G., 50 vjeç, banues në Elbasan.
Shērbimet e Policisë kanē ngritur pika kontrolli në të gjitha rrugët në hyrje e dalje si dhe po krehin zonēn ku dyshohet se janë larguar autorët.
Grupi hetimor ndodhet në vendngjarje dhe po grumbullon e fikson çdo provë që do shërbejë për zbardhjen e ngjarjes.
Një grup ekspertësh nga Departamenti i Policisë Kriminale në Policisë e Shtetit është nisur menjëherë në ndihmë të grupit hetimor për të bërë të mundur zbardhjen e shpejtë të ngjarjes.
