Banorët e lagjes “5 Maj” në Tiranë kanë vazhduar protestën kundër shembjes së banesave të tyre. Ata kanë thënë se nuk kanë firmosur asnjë marrëveshje me Bashkinë e Tiranës dhe kanë theksuar se shtëpitë i kanë të legalizuara.
“Këtu po na grabisin zonat, të gjithë duan të flejnë rehat në shtëpitë e veta, asnjë nga ne nuk ka firmos në Bashkinë e Tiranës. E kam shtëpinë të legalizuar, vijnë te ne ndërkohë që këtu kanë magazinat bosh. Me çfarë të drejtë? Pse shtëpitë nuk paskan cmim tregu, ne nuk kemi një marrëveshje zyrtare. Nuk vendos dot ai për shtëpitë tona me çmim reference, nuk jemi për bonus qeraje sepse kemi shtëpitë tona”, ka thënë një nga banorët.
Një tjetër banor është shprehur se ata kanë paguar taksa të rregullta dhe nuk mund të durojnë kur shteti u bën padrejtësi. Ai ka thënë se zona nuk është pjesë e rindërtimit dhe vuri në dukje se janë rreth 400 familje që do mbeten rrugëve. Ai ka thënë më tej se një fasoneri e Arben Ahmetajt që ndodhet në fund të rrugës, po mbështet IKMT-në në shembjen e banesave të tyre.
“Ne nuk jemi të pastrehë, i kemi ndërtuar vetë dhe kemi paguar cdo taksë në mënyrë të rregullt. Shteti po na bie në qafe, nuk kemi si të durojmë kur vijnë na rrafin në shtëpitë tona. Kemi bërë kërkesa dhe askush nga organet kompetente nuk ka sqaruar gjë. Zona jonë nuk është pjesë e rindërtimit, ne nuk kemi fatkeqësi natyrore. 12 faza me nga 40 shtëpi, janë rreth 400 familje që do mbeten rrugëve. Me kë e kanë bërë pazarin këta, a ka premtuar Bashkia ndonjë metër katror njësi për biznes? Pronat tona nuk keni për t’i gëzu! Fasoneria e Arben Ahmetaj është në fund të rrugës, mbështesin IKMT, hajdutat e tyre”, ka treguar banori.
