Disa toka bujqësore në fshatin Moravë të Beratit janë përfshirë nga një zjarr i fuqishëm mbërmjen e sotme. Mendohet se zjarri ka filluar pasi banorët kanë djegur mbeturina në arat dhe më pas nuk kanë mundur të shuajnë flakët që janë përhapur me shpejtësi edhe nga era.
Zjarri ka përparuar shpejt dhe i është afruar disa banesave dhe serave në fshatin Moravë. Ndërkohë, forca të shumta zjarrëfikëse kanë mbërritur në vendin e ngjarjes.
Ata janë duke u përpjekur që të neutralizojnë dhe të shuajnë flakët që përhapen me shpejtësi nga era. Ndërkohë, sipas burimeve mësohet se zjarri ka qenë i qëllimshëm dhe është duke u punuar për të kapur dhe identifikuar autorët.
Kujtojmë se zjarret në Shqipëri nuk kanë munguar edhe pas sezonit të thatësirave dhe temperaturave të larta dhe në disa raste kanë qenë të qëllimshme. Ndërkohë, gjatë verës në vend pati dhjetëra vatra zjarri aktive, për të cilat u deshën disa ditë që të shuheshin. Zjarri që përfshiu pjesën mbi tunelin e Kalimashit disa muaj më parë u shua pas ndihmës nga Forcat e Sigurisë dhe zjarrfikësit e Kosovës. Edhe në Fier situata ishte problematike, ku fusha e mbetjeve ishte nën flakë për disa ditë me radhë dhe shkaktoi një ndotje të madhe.
