Sot Prokuroria e Tiranës kishte ftuar kreun e PD-së Lulzim Basha të paraqitej në institucion, lidhur me kontratat e lobimit të Partisë Demokratike në SHBA. Basha së bashku me ish sekretarin e përgjithshëm Arben Ristani, ishte ftuar nga organi i akuzës për t’u njohur me përgjigjen e letërporosisë së SHBA për cështjen në fjalë, por në një letër drejtuar institucionit në fjalë demokrati ka refuzuar.
Sipas Bashës kërkesa e paraqitjes në prokurori është e pambështetur në ligj dhe e pa mbështetur në asnjë standard profesional dhe etik të hetimit.
Kryedemokrati bën të ditur se as ai dhe asnjë drejtues tjetër i Partisë Demorkatike nuk janë marrë nën hetim dhe nuk janë të pandehur në asnjë hetim, arsye për të cilën ata nuk ka nevojë të informohen dhe prokuroria nuk ka asnjë detyrim të informojë për të dhënat e verifikimeve që po bën.
“Fakti që një ftesë e tillë vjen 6 muaj pasi ju e keni marrë informacionin në fjalë dhe në një kohë kur ka filluar një fushatë keqinformimi me natyrën dhe ecurinë e hetimit në fjalë, na bën të mendojmë se veprimi juaj është bërë jo për qëllime hetimore, por për shërbime propagandistike politike.”-thuhet në letrën e Kryetarit të PD, Lulzim Basha.
