Kryeministri Edi Rama ka folur rreth çështjes shumë të diskutuar të patronazhistëve në konferencën e përbashkët me ambasadorin e BE, Luigi Soreca.
Rama tha se nuk ka parti politike në botë që nuk ka patronazishtë, ndërsa i cilësoi ata si infrastrukturën për të fituar zgjedhjet. Kryeministri komentoi edhe raportin e Komisionit Europian dhe tha se në të nuk flitet për patronazhistë dhe socialist. Ai u shpreh se të dhënat që në fakt u përdorën pa të drejtë, kanë qenë në internet për vite.
Rama shtoi se është shumë krenar për patronazhistët dhe deklaroi se pa ata Partia Socialiste nuk do t’i kishte marrë 74 mandate.
“Nuk ka parti politike pa patronazhistë, kudo në botë. Mund të kenë emra të ndryshëm, por patronazhimi është infrastruktura e një partie që hyn për të fituar zgjedhjet. Unë jo vetëm jam krenar, por jam edhe më shumë krenar për ta se para zgjedhjeve. Pa ta ne nuk do të ishim një makineri e pathyeshme, por do të ishim një foltore. Ndërkohë që raporti flet për pretendime që po hetohen, jo për patronazhistë, apo socialistë. Nuk ka pasur asnjë problem në dëme personale.
Kur flet për kartë identiteti, flet për një kartë që mban brenda të dhëna sensitive për personin, shëndetësore, financiare, sociale. Karta jonë është një targë, që s’ka brenda asgjë. Pra, nuk do të thotë asgjë nga pikëpamja e dëmeve sensitive. Të dhënat kanë qenë në internet prej vitesh. Ato nuk janë të vlefshme dhe nuk kanë asnjë lloj peshe dhe nuk duhen në punën e patronazhizmit. Për këtë arsye, ne nuk kemi pasur në bazën tonë të të dhënave këto elementë, por le të hetohen deri në fund. Që ta mbyll jam shumë krenar për patronazhistët, edhe më krenar se ç’isha para zgjedhjeve. Nuk do të kishim marrë 74 mandate, nëse shumë nga ata që votuan nuk do të kishin ngatërruar numrin e deputetit me numrat e partive të tjera. Në këtë aspekt kontributi i patronazhistëve është i pakrahasueshëm”, tha Rama.
