Jo pak herë Shqipëria ka qenë vendstrehimi i shumë personave që në vendet e tyre kanë kryer krime dhe këtë herë bëhet fjalë për dy indianë.
Dy vëllezërit Nitin Sandesara dhe Chetankumar Sandesara janë kërkuar për t’u ekstraduar në Indi pas një kërkese drejtuar prokurorisë sonë, e cila tashmë është miratuar. Kërkesa e ardhur nga gjykata e New Delhit ka qenë me motivacion të veçantë, pasi dy vëllezërit akuzohen për pastrim parash që kap një shifër marramendëse siç është ajo e 725 milionë dollarëve.
Gjykata e New Delhit jo pa të drejtë iu është drejtuar autoriteteve shqiptare, pasi prej vitesh, Nitin Sandesara dhe Chetankumar Sandesara kanë marrë nënshtetësinë shqiptare.
Nga ajo që mësohet dy vëllezërit kanë qenë pronarët e kompanisë farmaceutike Sterling Biotech. Përgjatë viteve 2008-2011 ata kanë marrë mbi 725 milionë dollarë kredi nga disa banka shtetërore të Indisë, para të cilat nuk kanë shkuar në llogarinë e Sterling, por janë zhdukur përmes një rrjeti prej 300 kompanish offshore të ngritura nga vetë ata.
Mirëpo kjo nuk do të rrinte e fshehtë gjithmonë. Në janar të vitit 2018, Agjenca e Krimit Ekonomik në Indi vendosi në pranga drejtorin e bankës që realizoi transaksionet në Indi, prej nga u zbulua edhe i gjithë mashtrimi.
Në po të njëjtën kohë autoritetet indiane bllokuan pronat e kompanisë Sterling Biotech, e cila u fut në proces falimentimi. Por dy vëllezërit Sandesara u arratisën nga India. Ndërsa janë në kërkim nga autoritetet indiane Nitin Sandesara dhe Chetankumar Sandesara kanë hapur dhe biznese të ligjshme në Shqipëri.
